„Bonus energia“: Le regolamënt nü jarà en forza indoman
Les deliberaziuns por ći che reverda le „bonus energia“ nü aprovades ai 5 de agost dala Junta provinziala y les diretives nöies sön l’efiziënza energetica di frabicać é gnüdes publicades incö (mertesc, ai 19 de agost) tl Boletin ofizial dla Regiun y jarà en forza indoman.
Cun les diretives nöies aprovades dala Junta provinziala él gnü amplié les condiziuns da denant por ći che reverda l’aplicaziun dl „bonus energia“ che vëgn conzedü tl caje de n mioramënt energetich di frabicać. „La novité dla regolamentaziun nöia é che le bonus energia po gnì apliché sides a frabicać nüs sciöche inće a frabicać bele esistënć. Cun chësta regolamentaziun vëgnel premié dandadöt chi che investësc tl mioramënt dl’efiziënza energetica dl frabicat y chi che – pro costruziuns nöies - prevëiga n’otimisaziun energetica sura les limitaziuns minimes preodüdes dala lege“, spliga l’assessur por l’energia Richard Theiner.
La regolamentaiun nöia prevëiga danter l’ater ćina la fin dl ann 2016 n „bonus energia“ dl 10 porcënt por düć i frabicać (nüs o bele fać sö) che arjunj le standard de „CasaClima B nature“, dl 15 porcënt por la tlassa „CasaClimaA“, y dl 20 porcënt por i frabicać cun le standard „CasaClima A nature“ (ćina śëgn êl dl 15 porcënt). Cun la zertificaziun „Ćiasa Clima nature“ ne vëgnel insciö nia ma valuté le anuzamënt d’energia dl frabicat y l’efiziënza energetica generala, mo inće la sostenibilité dl frabicat. Implü él ćiamò gnü portè dant n’atra novité: le bonus cubatöra ne vëgn da śëgn inant nia ma plü conzedü ti caji de n mioramënt dl’efiziënza energetica dla tlassa „Ćiasa Clima C“, mo inće ti caji olache al vëgn arjunt n mioramënt dl’efiziënza energetica dl frabicat cun la zertificaziun „Ćiasa Clima R“ (preodüda por ressanamënć). Le bonus energetich po gnì damanè dal zitadin por ma un n iade.
rc
