Or europeich por Tania Cagnotto, la Junta ti fej les aodanzes
Tania Cagnotto é (indô) campiona europeica. Incö (mercui ai 20 de agost) à l'atleta da Balsan davagné a Berlin la medaia d'or tla disciplina de salt dal trampolin da un en meter, süa ventejima medaia, de chëres bëgn trëdesc de or.
La Junta Provinziala ti fej insciö les mius aodanzes ala campiona südtiroleja: „Tania Cagnotto é na grandiscima campiona cun na storia de suzès che fej gnì capaze döt Südtirol“, dij le Presidënt dla Provinzia Arno Kompatscher y l’assessuria por le sport Martha Stocker.La medaia da incö é la tredejima medaia d’or de Tania Cagnotto por i campionać europeics, la ventejima dötadöm. „Chësta medaia é la demostraziun dl gran talënt y potenzial de Tania Cagnotto, tres deplü n'eroina dl sport tl Südtirol“, dij le Presidënt dla Provinzia Arno Kompatscher.
L’assessuria Martha Stocker ti fej a Tania Cagnotto nia ma les aodanzes por la medaia da incö, mo por döta süa cariera: „Cagnotto é bele da agn pro i pröms dl monn y chësc te na disciplina sportiva dër ria y complicada sides por ći che reverda la pert fisica sciöche inće chëra tecnica.“ La gran seria de suzesc ne desmostra insciö nia ma le gran talënt, mo inće la gran orenté de Tania Cagnotto, insciö Stocker che injuntëia: „I me infidi da dì che dessigü düć i zitadins dl Südtirol é capazi incö da podëi ti tignì i pügns a n’atleta tan speziala.“
rc
