DalaJunta: Ćina la fin dl ann gnaràl ativé les fires otiches te 110 frabica
Al sarà indöt sura 100 i frabicać publics (palać provinziai, comuns, scores) che podarà anuzè alplü tert ćina la fin dl ann 2014 dl internet asvelt por merit dles fires otiches. Le proiet é gnü aprovè incö dala Junta provinziala y é le tema zentral de n’acordanza danter la Provinzia y la SIAG (Informatica Alto Adige).
Cun chësta dezijiun se porta la Provinzia de Balsan tres plü inant por ći che reverda le percurs tl vers de n’aministraziun publica tres plü digitala, asvelta y moderna. „Nosc obietif – à splighé incö (02/09) l’assessuria por l’informatica Waltraud Deeg – é chël de mioré l’efiziënza dl’aministraziun publica cun colegamënć internet plü asvelć y sigüsc.“
La realisaziun dl proiet, che gnarà stlüta jö ćina la fin de chësc ann, prevëiga l’ativaziun dla rëi de fires otiches te 110 ofizi y frabicać provinziai, comunai, scores y atres strotöres publiches. Implü vëgnel inće laurè sön l’ativaziun dl internet asvelt te atres strotöres tl Südtirol vare por vare. Chëstes mosöres é gnüdes stabilides incö tres n’acordanza danter la Provinzia y la SIAG (Informatica Alto Adige).
N iade che la fasa de colegamënt é gnüda stlüta jö, podarà i aministradus publics che laora tles sëntes che a desposiziun l’internet asvelt, se coleghè te na manira sigüda y asvelta al web, sciöche inće ai Data Center dl’aministraziun publica. „I Data Center é da ciafè tla sënta dla SIAG a Balsan y le colegamënt asvelt nes conzed insciö la poscibilité de sparagne ressures, inće deache la gestiun di Data Center gnarà afidada a na sozieté publica che ne rajona nia ma tl vers dl'otimisaziun dl profit“, insciö Deeg.
rc
