Dai 11/09: Convëgn internazional sön la laûrs di andri a Corvara
Le convëgn scientifich „20th Cave Bear Symposium“ gnarà organisé dai 11 ai 13 de setëmber a Corvara y é dediché ales inrescides plü atuales sön les laûrs di andri y en general inće sön les perts de tiers y de porsones descurides y che va zoruch al tëmp preistorich. Le convëgn gnarà inaudè ofizialmënter en jöbia, ai 11 de setëmber dales 9 tl salf dles manifestaziuns a Corvara.
Les inrescides sön perts de porsones o de tiers ciafades do l'eté dles dlaciaziuns é por l'archirida de gran valüta y les descurides plü atuales é insciö al zënter dl convëgn „20th Cave Bear Symposium“. Le convëgn vëgn organisé dal Istitut de Paleontologia dl’Université de Viena en colaboraziun cun le Museum Ladin Ursus ladinicus y cun l'Assoziaziun turistica dl'Alta Badia. La pröma incuntada vëgn tignida
en jöbia ai 11 de setëmber
dales 9
tl salf dles manifestaziuns de Corvara
strada Col Alt 36.
Al sarà presënć ala daurida l’ombolt de Corvara Robert Rottonara y Oscar Alfreider, presidënt dl'Assoziaziun turistica dl’Alta Badia.
En jöbia, ai 11 de setëmber dales 9.30 ales 12.45 y dales 14.30 ales 18.15 gnaràl presentè zirca 15 relaziuns por inglesc che gnarà tignides da esperć y scienzià de reputaziun internazionala (danter l’ater da Michael Hofreiter dl’Université de Potsdam y da Gernot Rabeder dl Université de Viena che à inće studié la laûrs dl ander de Conturines). L'entrada ales relaziuns é debann.
En vëndres, ai 12 de setëmber él preodü dales 20.30 a San Ćiascian tla Ćiasa de J.B. Runcher n referat por porsones interessades (y nia espertes) por todësch sön „La laûrs ladina y l’ander de Conturines“ da pert de Gernot Rabeder dl Université de Viena, che à studié por de plü agn les particolaritês dla laûrs dl ander de Conturines. L’entrada é debann.
En sabeda, ai 13 de setëmber vëgn le convëgn stlüt jö cun na seria de presentaziuns „poster" y cun la visita di scienzià al Museum Ladin Ursus Ladinicus y sön Pralongià.
Le program cun dötes les informaziuns pon lì do tlican sön: http://icbs2014.at/
Informaziuns: Museum Ladin Ursus ladinicus, Strada Micurà de Rü 26, San Ćiascian, tel. 0474 524020, http://www.museumladin.it/.
rc
