Indoman Dé dla Porta Daverta: Les preparaziuns é prësc ultimades
La plaza Silvius-Magnago se trasformëia bel plan te n museum alaleria, olache indoman vëndres, ai 5 de setëmber gnaràl metü a jì le Dé dla Porta Daverta. Tratan le domisdé saràl poscibl da vijité de plü sëntes provinziales a Balsan, Maran, Bornech, Porsenù, Neumarkt y Schlanders y da s'informè sön les funziuns y ativitês dla Junta provinziala, dl Consëi provinzial y dl'Aministraziun provinziala.
Indoman, vëndres ai 5 de setëmber gnaràl metü a jì por le pröm iade le Dé dla Porta Daverta dla Junta provinziala, dl’Aministraziun provinziala y dl Consëi dla Provinzia. Bele incö él da odëi les preparaziuns sön la plaza Silvius Magnago a Balsan, che sarà le punt d’indunada zentral dla scomenciadia y olache al vëgn metü sö dötaurela tëndes che gnarà anuzades indoman domisdé por la presentaziun di sorvisc provinziai plü desvalis. I ortolans di urć de Ćiastel Trauttmasdorff arjignà ca i ciüf y les plantes por abelì la plaza, sön i scalins che porta al Consëi provinzial vëgnel istalè dötaurela na paladina por i grups musicai che à davagné n concurs metü a jì te döta la Euregio y che se fistidiarà indoman dla pert musicala. La pert ofiziala dl Dé dla Porta Daverta metarà spo man dales 17.30 cun les parores de salüt dl Presidënt dla Provinzia Arno Kompatscher y dl Presidënt dl Consëi provinzial Thomas Widmann.
Indoman podaràn nia ma vijité la plaza Silvius Magnago (ativitês programades dales 13 ales 19) mo indöt prësc 20 sëntes dla Provinzia a Balsan, Bornech, Maran, Porsenù, Neumarkt y Schlanders indoman dales 13 ales 17. Le program dl domisdé é da ciafè sön internet tres la Rëi Zivica: http://www.provinz.bz.it/de-autonomia/.
Valgügn highlights da anuzé pro le Dé dla Porta Daverta: vijites al ofize dl Presidënt dla Provinzia Arno Kompatscher y al Consëi provinzial, olache al gnarà splighé le trú de na lege dala proposta al’aprovaziun, vijites ai laboratori y ala staziun a val dla furnadoia che porta sön Ritten, na vijita al salf de control di tunì tl Palaz provinizial 2 y tröp d'ater – A düć chi che ô se fà n’idea di sorvisc che la Provinzia aministrëia ti vëgnel indoman pité na buna ocajiun.
rc
Galaria dales fotografies
