Rové le pröm Dé dla Porta Daverta – Afluënza sön plaza Magnago
Le tëmp grisc y da niores n’à nia archité la pröma ediziun dl Dé dla Porta daverta dl’Aministraziun provinziala, dla Junta y dl Consëi provinzial gnü organisé incö (vëndres ai 5 de setëmber). Na buna afluënza él gnü registrè sön plaza Silvius Magnago y tl Consëi provinzial, mo inće te atri Palać provinziai él stè vijitadus che s’à fat odëi.
Le Presidënt dla Provinzia Arno Kompatscher y le Presidënt dl Consëi provinzial Thomas Widmann à stlüt jö le dé dla porta daverta cun na picera pert ofiziala sön plaza Silvius Magnago. Kompatscher à sotligné la gaujiun de chësta scomenciadia che é le Dé dl’Autonomia, che vëgn festejé ai 5 de setëmber, dé che recorda la sotescriziun dl Tratat de Paris danter la Talia y l’Austria tl ann 1946.
„Chësta sotescriziun é la basa por na proteziun internazionala dl’Autonomia dl Südtirol y é stada na garanzia por le svilup che ùn albü ćina incö“, dij Kompatscher che ajuntëia: „Che al momënt sunse confrontà cun dificoltês n’é nia da ascogné, mo chëres unse bele tres albü. L’autonomia à porté para a na defenüda dles mendranzes che à funzioné y che funzionëia dötaurela, tan inant che sun deventà n ejëmpl mondial.“
Śëgn él important da defëne chël che é bele gnü arjunt y da recuperé ći che é gnü pordü, à dit Kompatscher incö. „Chësc te dui vari: naôta él da stabilì avisa les competënzes dla Provinzia y dl Stat, por te n secundo momënt porvè da nun ciafè laprò inće te na cornisc transfrontaliera, sciöche tl raiun dl’Euregio“, insciö Kompatscher.
Por recordè chësta acordanza storica él gnü metü a jì chësc ann na scomenciadia particolara: te indöt 19 sëntes dl’aministraziun provinziala, da Maran, ćina Porsenù, Balsan, Bornech, Neumarkt y Schlanders gnaràl daurì les portes di ofizi y dles sëntes provinziales por na vijita di zitadins. Al é gnü metü a jì danter l’ater vijites al ofize dl Presidënt dla Provinzia Arno Kompatscher, vijites ai laboratori y ala staziun a val dla furnadoia che porta sön Ritten, na vijita al salf de control di tunì tl Palaz provinizial 2. La plaza Silvius Magnago é stada al zënter dl’dé, olache de plü sorvisc dla Provinzia s’à presentè y a dè informaziuns sön sües funziuns y ativitês. Tl Consëi provinzial él gnü pitè vijites acompagnades y spligaziuns sön la funziun dl Consëi provinzial y sön le trú de na lege dala proposta al’aprovaziun. Inće i assessurs dla provinzia à fat para al dé dla porta daverta, se presentan la maiù pert ai vijitadus te „sü“ palać provinziai.
„Nosta idea cun chësta scomeciadia é stada chëra da ti portè ai zitadins plü daimprò l’autonomia, da ti mostrè che al se tratà dl’autonomia di zitadins y da ti mostré sciöche l’aministraziun publica funzionëia“, insciö Kompatscher che stlüj jö: „I pënsi, no, i speri, che chësc nes sides garatè.“
Chi che ô ti dè n’odlada ćiamò en iade al Dé dla Porta daverta, ciafa na seria de fotografies sön la plata web metüda sö aposta tlican sön: http://www.provinz.bz.it/de-autonomia/
rc
Galaria dales fotografies
