Violënza cuntra i mituns:l’assessuria Deeg se damana plü laûr de prevenziun
I dać che é gnüs publicà da püch tres n stüde dl Unicef sön la violënza sön i mituns manifestëia na situaziun de preocupaziun: l’assessuria por la familia Waltraud Deeg se damana insciö por le Südtirol „n majer sforz por ći che reverda la prevenziun cuntra la violënza“. N conzet de prevenziun vëgn atualmënter laurè fora dala Repartiziun Familia, implü él tosc preodü n convëgn sön chësc tema
Por ći che reverda l’analisa publicada da püch dal Unicef sön la violënza sön i mituns recorda l’assessuria por la familia Waltraud Deeg che al é important da laurè sön la prevenziun de violënza y sön la consulënza por les families: „Le stüde publiché dal Unicef nes confermëia che la violënza cuntra i mituns é n fenomenn massa presënt cuntra chël che i messun laurè cun atenziun. Sides i geniturs che i mituns mëss gnì sostignis.“ Por chësta rajun laôra la Repartiziun Familia atualmënter a n conzet de prevenziun y a n convëgn por otober, insciö l’assessuria Deeg.
„La prevenziun y la formaziun – spliga l’assessuria – é i dui pilastri prinzipai de nosta politica por la familia. Por ći che reverda la tematica dla violënza cuntra i mituns, é nosc obietif chël da stlü ite dötes les perts interessades, meton a desposiziun les ressurses che va debojëgn por ti dè la poscibilité ai zëntri de consulënza da laurè dantadöt sön la prevenziun, y te n secundo momënt tres terapies sön l’assistënza.“
La presënza y le svilup dla violënza depënn gonot inće dal contest familiar. „Le stüde metü a jì dal Unicef indichëia che straufunghes fisiches y la presciun psicologica vëgn gonot odüdes sciöche mesi d’educaziun legitims, dantadöt te families olache i geniturs à n livel de formaziun bas o por la manćianza de competënzes d’educaziun“, insciö Deeg che sotlignëia, che „avisa por chëstes rajuns él important da renforzè la familia y da formè inant les competënzes educatives y interpersonales di geniturs, sciöche inće da cherié na rëi de sostëgn sön le teritore por les families che s’ativëia denant che la violënza vëgnes adorada.“
rc
