Le Südtirol é n model por la racoiüda despartida de refodam
Le Südtirol alda pro les prömes regiuns a livel europeich por ći che reverda la racoiüda despartida de refodam, mo la cuantité de refodam südtiroleja é ćiamò massa alta: chisc é i resultać dl raport dl 2013 sön la gestiun dl refodam dla Provinzia de Balsan. „L’obietif prinzipal é chël – insciö l’assessur por l’ambiënt Richard Theiner – da prodüje tl dagnì tres de manco ciomënt“.
Tl 2013 é la cuantité de refodam dl Südtirol stada de 53.200 tonelades de refodam „vërt“ y biologich, la cuantité dla racoiüda despartida é stada de 91 mile tonelades y chëra de refodam da ćiasa de 96.200 tonelades. Laprò vëgnel ajuntè 894.600 tonelades de resti de material de costruziun, 600 mile tonelades de refodam industrial y 59.400 tonelades de paltan de sarenara. „Sce da öna na pert unse podü registré n pice smendrimënt dla cuantité complessiva dl refodam él dal’atra pert gnü mosoré na maiù cuantité dl refodam por ći che reverda la racoiüda despartida“, à sotligné incö l’assessur Richard Theiner.
Tolon en conscidraziun na perioda plü lungia y le svilup ti ultimi agn y dezenns él gnü registré tla Provinzia de Balsan n andamënt positif, „mo le fat che la popolaziun aumentëia ann por ann y che inće la sozieté südtiroleja se svilupëia tres deplü devers na sozieté dl consum, à sciöche conseguënza n aumënt dl refodam. L’obietif é chël da antergnì diretamënter ala fontana, porvan da eliminé les cosses surafora bele canche an cumpra“, insciö Theiner.
Por ći che reverda indere la racoiüda despartida de refodam é le Südtirol n ejëmpl te döta la Talia. Chësta fej fora le 60 porcënt y é n raport cun la Germania (65 porcënt) y l’Austria (62 porcënt) pro les prömes tl’Europa. „13 porcënt dla racoiüda despartida röia tles desćiaries y chësc dat é tres ćiamò massa alt“, à sotrissé incö Flavio Ruffini, diretur dl’Agenzia por l’ambiënt che recorda che chësc porta pro a dagns dla capazité teritoriala dl Südtirol, „che ne é insciö nia tan grana“.
Le diretur dl Ofize Gestiun dl Refodam, Giulio Angelucci, à sotligné che la desgorta de refodam tl Südtirol vëgn efetuada te implanć moderns y cun standarg de cualité alć y à recordè che: „Al é tres damì da evité refodam, deache la racoiüda y le reanuzamënt dl refodam porta tres para n sfrutamënt dl ambiënt. Tl dagnì saràl important da stlarì inće le raport danter la sozieté dl Südtirol y le refodam che ara prodüj.“
rc
