Kompatscher indoman a Roma: Incuntada cun Lupi por l’A22 y le tunel de basa
La prorogaziun dla conzesciun por l’autostrada A22 y le finanziamënt trasversal dl tunel de basa dl Prener sarà i temesc prinzipai dl’incuntada da indoman mercui, ai 10 setëmber, a Roma danter le Presidënt dla Provinzia Arno Kompatscher, le minister dles Infrastrotöres y dl Trasport Maurizio Lupi y le Presidënt dl Trentin Ugo Rossi.
L’incuntada gnarà tignida dales 11 tla sënta dl Ministêr dles Infrastrotöres y dl Trasport a Roma y podess portè pro a progresc importanć por ći che reverda dui obietifs a chi che la Provinzia da Balsan laôra bele da plü mëisc. Da öna na pert gnaràl tratè la prorogaziun dla conzesciun dla gestiun dl’autostrada dl Prener A22 y dal’atra pert l’assiguraziun dl finanziamënt trasversal por la realisaziun dl tunel de basa dl Prener.
„I ne conesciun nia ćiamò ofizialmënter le contignü dl decret „Sblocca Italia" – à sotligné incö le Presidënt dla Provinzia Arno Kompatscher do la sentada edemala dla Junta provinziala – mo da ći che i sun stà bugn da capì dëssel gnì inserì inće l’impëgn da fà na proa a livel europeich por arjunje n arlunjamënt contratual por la conzesciun dl’autostrada.“ La perioda da portè inant a livel europeich chësta proposta é otimala, conscidran che la Talia à la Presidënza de rode dl Consëi dl’Uniun Europeica, recorda Kompatscher.
Le Presidënt dla Provinzia à baié de na prorograziun de vint agn, „n passaje che garantiss la poscibilité da ne finanziè nia ma le tunel de basa dl Prener y sües trates d’azès, mo inće na seria de operes y mosöres che alisirass le passaje dl trafich dala strada ales scines, y che smendriss en general inće l’incuinamënt ambiental y acustich sön la trata dl Prener.“ Na tematica dla sentada sarà inće la realisaziun dla zirconvalaziun de Balsan, che dess gnì cofinanziada dal conzescionar dl’autostrada, insciö Kompatscher.
rc
