La Macroregiun alpina al zënter dl’incuntada danter Schuler y Rupprechter
La colaboraziun suraregionala y transfrontaliera tla Regiun europeica dla Euregio, la promoziun de na Macroregiun alpina y le svilup dl’agricoltöra tl'Europa é stades les tematiches prinzipales tratan la vijita da inier (09 de setëmber) dl minister por l’Agricoltöra dl’Austria Andrä Rupprechter y dl’assessur por l’agricoltöra Arnold Schuler ala lataria de Sterzing.
La lataria de Sterzing, insciö à constatè i vijitadus, é n aziënda model por ći che reverda la lauraziun dl lat y por l’independënza energetica che contribuësc ala sconanza dl’ambiënt. Tla lataria, le secundo datur de laûr plü gran dla cité, laôra indöt 140 colaboradus y dla cooperativa fêjel pert 430 mëmbri che dà jö 150.000 litri de lat al dé. „Dal pröm d'aurì dl 2014 nes condüj inće 200 paurs so lat dala pert dl’Alta Val d’Isarch che alda pro le Land Tirol y dal Stubaital cun le valur mesan de 28.000 chili al dé“, à sotligné le suranstant dla cooperativa Adalbert Braunhofer y le aministradù Günther Seider che à ajuntè, che la lataria prodüj al dé zirca 1,5 miliuns de goti de iogurt.
L’assessur por l’agricoltöra Arnold Schuler y Andrä Rupprechter, che é le Minister austriach por l’agricoltöra, l’economia forestala, l’ambiënt y l’economia dl’ega dal 2013 inant, à debatü tratan la vijita sön plü tematiches dla politica agrara: i temesc dl’incuntada é stà la problematica dl smendrimënt dl prisc dl lat tl'Europa, les premies por les vaćies da lat, l’arjunjimënt dles ojoradöres sö por munt y l’imaja positiva dl’agricoltöra. Implü él gnü debatü sön le finanziamënt dl’agricoltöra da munt tl contest dla reforma agrara dl’UE y sön la candidatöra de Phil Hogan por l’inćiaria de comissar europeich por l’economia agrara. Sön la chestiun dla promoziun de na Macroregiun dles Alpes s’à Schuler y Rupprechter mostrè a öna da „portè inant deboriada la proposta.“
„Mia pröma vijita ofiziala tl Südtirol“, à stlüt jö le Minister Rupprechter“, é stada sciöche na vijita a ćiasa. Cun le Presidënt dla Junta Kompatscher y cun l’assessur Schuler unse metü la basa por na colaboraziun te plü seturs.“
rc
Galaria dales fotografies
Foto: USP/mac
Foto: USP/mac
Foto: USP/Maja Clara
