L’assessuria Deeg incunta le Diretur general nü Staffler
Hanspeter Staffler metarà man süa inćiaria nöia sciöche Diretur general nü dla Provinzia ofizialmënter al pröm d’otober. Incö (29 de setëmber) ti à l’assessuria por l’aministraziun Waltraud Deeg surandè süa funziun nöia tl’aministraziun publica. Ara ti aôda al diretur general n bun garatè „pro l’ademplimënt di compić da afrontè“ y le inviëia a anuzé deplëgn dles funziuns che ti é gnüdes surandades
Hanspeter Staffler é stè ćina śëgn diretur dla Proteziun zivila y cun en mercui, le pröm de otober saràl ofizialmënter le Diretur general nü dl’Aministraziun provinziala. Les döes funziuns dl diretur general nü (Hanspeter Staffler) y dl secreter general dla Provinzia (Eros Magnago) é gnüdes despartides dala Junta provinziala cun la lege finanziara dl 2014. Staffler é insciö le pröm Diretur general dl’Aministraziun publica che à passa 18.000 dependënć y che à en gestiun n budget de presciapüch cinch miliarg de euro. Süa inćiaria zentrala sarà chëra da orientè le prozès de svilup dl’aministraziun publica cuntra na gestiun plü efiziënta, moderna y dlungia ai zitadins. L’assessuria por l’aministraziun publica Waltraud Deeg sarà süa porsona politica de referimënt.
„L’inovaziun dl’aministraziun, la scemplificaziun dles prozedöres aministratives, la suravijiun dles ressures finanziares y personales sciöche inće la seleziun y la suravijiun dl personal diretif alda pro les funziuns prinzipales dl Diretur general nü“, à splighé incö l’assessuria Waltraud Deeg tratan la surandada ofiziala dl’inćiaria. L’assessuria Deeg se conforta a na buna colaboraziun „por svilupé inant l’aministraziun publica y realisé n apart aministratif ćiamò plü modern, inovatif y de crëta por i zitadins.“
Le Diretur general nü Staffler arà süa sënta prinzipala tl Palaz Widmann, por le momënt al à a despoziun n ofize tl Palaz provinzial 3a, sënta dla Repartiziun Aministraziun dla Provinzia.
rc
Galaria dales fotografies
Foto USP/jw
Foto USP/jw
