Dala Junta: ćiamò 3 miliuns por les cooperatives de garanzia
Ti assiguré ales impreses locales na majera licuidité mëton inće a desposiziun ressurses nöies por les cooperatives de garanzia: cun chësc obietif à la junta provinziala preodü incö (ai 9 de dezëmber) 3 miliuns de euro por les cooperatives Confidi y Garfidi, n stimul che podarà garantì credić bancars por altamo 30 miliuns de euro.
La situaziun economica ("che é tl Südtirol miù co tles atres regiuns vijines", à dit le presidënt dla Provinzia Arno Kompatscher) se damana inće mosöres nöies a bëgn dles impreses por ti ester damì ai tëmps d’aspeta di paiamënć y la reduziun dles linies de credit dles banches. Porchël à la junta tut la dezijiun da renforzè les ressurses finanziaries desponibles por les cooperatives de garanzia Confidi y Garfidi a bëgn dles pices impreses y dles impreses mesanes locales. L'obietif é: "Renforzè les garanzies a bëgn dles pices impreses y dles impreses mesanes por aumentè sü investimënć y miorè la licuidité", à dit Kompatscher do la sentada dla junta.
Ti ultimi mëisc à n grup de laûr delineé do tröpes incuntades cun les banches chësc stromënt de reanimaziun dl'economia locala tres les cooperatives de garanzia. La junta à porchël tut la dezijiun da mëte sö n fonds spezifich de 3 miliuns de euro a bëgn dles cooperatives de garanzia: "Al é n impuls por mirit de chël che les banches metarà a desposiziun dles pices impreses y dles impreses mesanes ressurses finanziares nöies de altamo 30 miliuns de euro", à splighé Kompatscher.
Le fonds d’azès dles impreses ales garanzies vëiga danfora destinaziuns spezifiches: garanzies por la pröma domanda de finanziamënć alisirà tres le fonds de rotaziun; garanzies spezifiches a bëgn de impreses che delibrëia n aumënt de capital; garanzies spezifiches a bëgn de start up inovatives; garanzies por impreses por podëi avëi azès a antizipaziuns de sostëgns publics o contrać stlüć jö cun la aministraziun publica. Le paiamënt di finanziamënć é lié ala stipulaziun de acordanzes spezifiches cun i istituć bancars che conzed le credit garantì da chësc fonds y implü "él lié inće ala stipulaziun de acordanzes de cooperaziun danter les döes cooperatives Confidi y Garfidi che conzedarà da adorè sinergies por miorè l'aministraziun y smendrì i cosć", à stlüt jö Kompatscher.
USP
