Mobilité sostenibla tl Südtirol: La Junta stabilësc i proscims vari
La mobilité cun la roda, la mobilité eletrica y le mioramënt dla mobilité intermodala danter i mesi de trasport é i trëi pilastri sön chi che la Junta provinziala ô svilupé süa strategia por na mobilité sostenibla tl Südtirol. Incö (09/12) él gnü aprovè dala Junta n plann d'atuaziun cun nü prioritês.
Un di obietifs detlarà dala Junta provinziala é chël da svilupé la mobilité tl Südtirol tres deplü tla direziun dl anuzamënt de mesi de trasport che scona l’ambiënt, cun na mobilité alpina che respetëia les ressurses naturales y che aumënteia insciö la cualité de vita tl Südtirol. Insciö à la Junta provinziala aprovè incö, mertesc ai 9 de dezëmber, n plann cun plü mosöres concretes por l’aumënt dla mobilité sostenibla tl Südtirol che é gnü laurè fora dala BLS, dal Ökoistitut y dal Frauenhofer Istitut. „Le plann elaborè prevëiga mosöres spezifiches ti seturs dla mobilité cun la roda, dla mobilité eletrica y dla mobilité intermodala. Te chisc trëi ćiamps él gnü svilupé indöt nü mosöres prinzipales“, à splighé incö l’assessur por la mobilité Florian Mussner.
L’assessur à porté dant la ligna de mosöres preodüdes: insciö déssel gnì realisé, en colaboraziun cun les sozietês che à en gestiun le renfornimënt, ćina le 2018 de indöt 30 staziuns por ćiarié rodes y auti eletrics. Na secunda mosöra é da avëi ćina tl 2020 indöt 1000 auti eletrics che zircolëia tl Südtirol. Por arjunje chësc obietif él preodü da s’anuzé de n proiet de sostëgn aposta dla Uniun Europeica.
Implü él inće preodü da chirì fora un n comun tl Südtirol che dess spo deventè n ejëmpl concret dl’atuaziun de mosöres por na mobilité plü sostenibla cun la poscibilité por i atri comuns da analisé les conseguënzes concretes dl’atuaziun. Öna dles mosöres preodüdes é inće le slariamënt dl concurs cun la roda „Südtirol radelt“ (cun l’obietif da rové a un n miliun de chilometri) y l’ampliamënt dl conzet de car-sharing cun l’adoranza de auti eletrics nüs. „Implü gnaral metü a jì n proiet de bike-sharing y cursc de ajornamënt di aturs prinzipai tles aziëndes y di responsabli che tol les dezijiuns plü importantes tl setur dla mobilité“, insciö Mussner che sotlignëia, che al gnarà metü a jì inće tl dagnì proieć de sensibilisaziun sön na mobilité sostenibla tles scores y demostraziuns de mobilité eletrica. Por la realisaziun de chëstes mosöres gnaràl istituì n suranstant zentral che coordinarà dötes les mosöres.
Les spëises por l’atuaziun dles mosöres dl proiet „mobilité vërda“ vëgn finanziades por le 70 porcënt dala Uniun Europeica y dal Stat, 10 porcënt vëgn da organisaziuns privates y la pert che resta vëgn sostignida dala Provinzia tres mesi finaziars che röia dal Inovaziun. La basa dla strategia dla green mobility dla Junta provinziala é la sconanza dl tlima tres la reduziun dles emisciuns de CO2: sce an conscidrëia che tl Südtirol é l’emisciun anuala de CO2 por vigni porsona de 4,9 tonelades y che 2,3 tonelades vëgn dal trafich, spo desmostra chësc l’importanza de antergnì te chësc setur.
rc
