Autostrada dl Prener:Degun daz por pendolars sce la strada statala é stlüta
Sce la strada statala dl Prener (SS12) sarà stlüta y l’autostrada messarà gnì adorada dai pendolars sciöche sóra alternativa de deviaziun, ne saràl nia plü nezesciar da paié le daz. Chësc é le contignü de na convenziun che gnarà firmada dala Provinzia y dal A22.
La Junta provinziala à stabilì incö te süa sentada edemala da ti dè l’inćiaria al assessur pro la mobilité Florian Mussner da firmé na convenziun cun l’autostrada dl Prener por l’esenziun dl paiamënt dl daz dl’autostrada ti caji che ara vëgnes anuzada sciöche deviaziun por la stlüta de na strada statala, sciöche al é sozedü de aurì dl 2014 cun la stlüta dla strada statala dl Prener SS12 sön la trassa Balsan – Porsenù. „Canche la strada statala dl Prener mëss gnì stlüta por avenimënć naturai, sciöche por ejëmpl na roa, spo dess i pendolars podëi adorè l’autostrada debann zënza messëi paiè le daz“, à splighé incö le presidënt dla Provinzia Arno Kompatscher.
Döes é les condiziuns che porta al’esenziun dl paiamënt: la strada statala mëss romagne stlüta por almanco n’edema y l’autostrada mëss ester l’unica poscibilité de deviaziun. Implü mëssel inće ester presënć cantiers tl medemo tëmp sön l’autostrada. Düć i pendolars che s’anüza te chësc caje cun chëstes condiziuns dl’autostrada (adoran l’entrada tl’autostrada plü dlungia ala sarada y la sortida dal’autostrada atira dedô) ne messarà nia paié le daz. Düć i mesi de passaje sön la medema trassa dl’autostrada messarà paié le daz tresfora.
„Por mëte en pratica chësta esenziun gnaràl sotescrit na convenziun danter la Provinzia y l’aziënda che à en gestiun l’A22. Chësta convenziun prevëiga l’esenziun dl paiamënt dl daz por chi che mëss adorè l’autostrada sciöche deviaziun nezesciara dla SS12“, insciö le presidënt Kompatscher che à sotligné che la pert aministrativa gnarà organisada dal’Autostrada dl Prener y che la Provinzia metarà a desposiziun i mesi finaziars por curì les spëises di dać nia paià dai pendolars.
rc
