Anuzadus dles ferates: timbradöres record por le 2014, 932mile te otober
Sön les trasses dla ferata locala él gnü registré d’otober indöt 932.682 timbradöres. „Al é le valur de timbradöres plü alt che é gnü registré da tres te un n mëis tl Südtirol, y al é la testimonianza che l’oferta ampla de ferates locales vëgn anuzada tres de plü dai utënć“, sotlignëia l’assessur por la mobilité Florian Mussner.
Le record plü alt da denant é gnü registré le mëis de setëmber 2014 cun 884.935 timbradöres tles staziuns dla ferata locales: tl mëis de otober é le valur aumentè de indöt 48mile timbradöres. Tl medemo tëmp vëgnel laurè ai proscims obietifs, dandadöt deache tles ores cun la maiù presënza de viajiadus él gnü arjunt la capiënza mascimala: „Tres la cumpra de vaguns nüs, l’eletrificaziun dla ligna dla ferata dla Val Venosta y d’atres mosöres laorunse por aumentè la capiënza dl trasport publich y l’efiziënza te chësc setur“, à dit l’assessur Mussner.
Öna dles conseguënzes dl ampliamënt di coliamënć dles ferates é stada ti ultims agn l’aumënt di anuzadus dl trasport publich. Tl 2014 él insciö gnü registré n aumënt dl 7 porcënt en confrunt al 2013: 15 porcënt implü tla Val de Puster, 14 porcënt implü sön la linia por Maran, 11 porcënt implü tla Val d’Isarch y 4 porcënt implü tl Unterland y Überetsch. Tla Val Venosta ne s’à le numer de viajadus nia mudé chësc ann, scebëgn che ti mëisc da d’isté y da d’altonn él gnü smendrì le numer dles ferates sön chësta linia por gauja de laûrs de manutenziun straordinars.
Recorg nüs é inće gnüs registrà por ći che reverda les singules timbradöres tles staziuns dles ferates: a Balsan él gnü registré 206mile timbradöres tl mëis d’otober (cun les staziuns de Balsan Süd y Casanova nen n’él indöt 230mile), a Porsenù é le valur de 66mile y a Bornech de 47mile timbradöres. N valur de morvëia à inće arjunt la staziun de Bornech Nord che à bele registré do da un n ann sura 19mile viajiadus al mëis.
rc
