Sis implanć portamunt nüs, 60 miliuns d’investimënć
Indöt él sis implanć portamunt nüs cun n investimënt de 60 miliuns de euro: l’Ofize Implanć portamunt dla Provinzia à fat n bilanz dl ann 2014 y à costatè cun sodesfaziun che dötes les furnadoies é gnüdes realisades en tëmp por le mëteman dla sajun da d’invern.
I investimënć tl setur di implanć portamunt é de importanza strategica, y chësc por de plü gaujes, sciöche l’assessur competënt Florian Mussner sotlignëia te chësc contest. „Da öna na pert é les furnadoies n pilaster zentral dl turism da d’invern, dal’atra pert é les dites che fej sö les furnadoies dl post: chësc porta plü vantaji por le monn dl laûr local“, insciö l’assessur Florian Mussner che ajuntëia che i implanć portamunt à desmostrè tl tëmp inće süa importanza por le trasport publich local: „Dui ejëmpli de suzès é danter l’ater la furnadoia che porta sön le Ritten y de Burgstall-Vöran dlungia Maran, olache i laûrs de renovamënt dla furnadoia, cun cabines nöies che portarà 35 passajiers, gnarà scrić fora tl scomenciamënt dl 2015.“
Por ći che reverda i implanć portamunt ti raiuns da jì cun i schi él stè meso da rovè por le scomenciamënt dla sajun la cabinovia nöia „Borest“ che coliëia Corvara y Calfosch. „La rô che é gnüda jö ala fin d’aurì é gnüda neutralisada y canalisada, inće por merit dl intervënt dla Repartiziun Costruziuns idrauliches y dla sozieté dl implant portamunt“, spliga Markus Pitscheider, diretur dl Ofize Implanć portamunt. A Corvara tl'Alta Badia él implü gnü remplazè le lift da trëi scagns „Pralongia“ cun n lift da sis scagns, sciöche inće le lift da trëi scagns „Tschein“ tl raiun da jì coi schi dl Karerpas cun n lift da sis scagns plü modern y sön na trassa plü lungia.
D’atri proieć realisà dl 2014 por ći che reverda i implanć portamunt ti raiuns da jì cun i schi é: les döes cabinovies da ot „Stiergarten“ y „Drei Zinnen“ (Trëi pizes de Lorëi) tl raiun da jì cun i i schi dles Dolomites dl Sest. „I raiuns da jì cun i schi dles Dolomites dl Sest é implü gnüdes coliades inće ala trassa dla ferata cun la daurida dla staziun dles ferates de Vierschach, da chëra che an po arjunje les pistes zënza auto diretamënter dala staziun“, insciö l’assessur Mussner. N coliamënt, ferata-pista, che é bele gnü realisé a Percha, olache an po arjunje les pistes de Plan de Corones diretamënter dala staziun dla ferata. N ater implant portamunt realisé dl 2014 é la cabinovia dl „Rosim“ che coliëia i raiuns da jì cun i schi de Kanzel y Madritsch tl Sulden dlungia l'Ortler.
Düć i proieć de implanć portamunt dl 2014 é gnüs colaudà por le scomenciamënt dla sajun da d’invern. „Indöt é stè l’investimënt anual dl 2014 te implanć portamunt tl Südtirol de 60 miliuns de euro, zënza conscidré les pistes dai schi, i sistems por l’inevaziun, i iać da la nëi y d’atres strotöres te chësc setur“, stlüj jö le diretur Pitscheider.
rc
