Museum Ladin: Daurida da d'invern y festa por la fin dl ann
I Museums Ladins Ćiastel de Tor (San Martin) y Ursus Ladinicus (San Ćiascian) deura indô sües portes ai 26/12 do la palsa sajonala da d’altonn. Ai 30/12 vëgnel metü da jì tl Museum Ladin a San Martin la festa tradizionala por la fin dl ann cun entrada debann al Museum, intratignimënt musical, füć d’artifize, na chentlada jö por la pista da “Picolin” y n sorvisc de trasport da Picolin al Ćiastel.
Les döes sentes dl Museum Ladin, öna a San Martin (Ćiastel de Tor) y l’atra a San Ćiascian (Ursus Ladinicus) podarà indô gnì vijitades dai 26 de dezëmber inant, data dla daurida da d’invern do la palsa sajonala da d’altonn. Ćina ai 10 de jenà dl 2015 él preodü tresfora n orar de daurida spezial dales 15 ales 19 vignì dé. Dal 11 de jenà sarà i museums daverć ćina en Pasca (ai 5 d’aurì) vigni jöbia, vëndres y sabeda dales 15 ales 19.
Inće chësc ann él sön le program dl Musem Ladin Ćiastel de Tor la festa tradizionala por la fin dl ann che vëgn metüda da jì ai 30 de dezëmber en colaboraziun cun l’Assoziaziun turistica da San Martin y l’Uniun dl Sport da San Martin. Tratan la serada él preodü l’ingrès debann al Museum (dales 20:30 a mesanöt) y n valgönes ores de aorela cörta cun intratignimënt musical dales 21 ales 24 cun le grup “Die Verspielten”, vin cöt y checs tla curt interna dl Ćiastel y daldô tl foyer dl Museum. Un di punć culminënć dla festa sarà dales 21:30 la chentlada jö por la pista da “Picolin” a San Martin y i füć d’artifize por festejè deboriada la fin dl ann 2014. Dales 20:30 ales 24 saràl a desposiziun di ghesć inće n sorvisc de trasport debann da Picolin (ostaria Posta) al Museum Ladin San Martin de Tor, cun architades sön la plaza dla (ex) fossenara jö Pradel y tl zënter dl paîsc (ostaria Dasser).
De plü informaziuns: Museum Ladin Ćiastel de Tor, strada Tor 65, San Martin, tel. 0474 524020, www.museumladin.it. La plata internet pîta inće na vijita virtuala al Museum cun les informaziuns plü importantes por düć i interessà.
rc
