La Junta à aprovè le program FSE, 144 miliuns d’investimënć por le laûr
Formaziun, ajornamënt, mioramënt dl azès al marćé dl laûr, n’aministraziun efiziënta y la combatüda cuntra la meseria y les descriminaziuns: Chisc é i seturs por chi che al é preodü co-finanziamënć dal Fonds Sozial Europeich dal 2015 inant por i proscims cinch agn (ćina le 2020). La Junta provinziala à aprovè incö (23/12) le program opearif, che gnarà ejaminé śëgn dal’UE.
„Tres le Fonds Sozial Europeich (FSE) – à sotligné le presidënt dla Provinzia Arno Kompatscher incö, mertesc ai 23 de dezëmber a Balsan – vëgnel sostignì plü formes d’intervënt, cun chëres che al é poscibl da aumentè les oportunitês nöies söl marćé dl laûr.“ Le forma de sostëgn prinzipala, por ći che reverda le program FSE 2014 – 2020 reverda la formaziun, l’ajornamënt y l’educaziun permanënta, che contignarà zirca le 40 porcënt dla totalité dles ressurses.
Implü él preodü tres le Fonds Sozial Europeich le finanziamënt de mosöres cuntra l’arbandonamënt scolastich y de sostëgn por l’avalianza d’azès ales oportunitês formatives y por na maiù concordanza danter les ofertes de formaziun y les esigënzes de ocupaziun che vëgn damanades dal marćé dl laûr.
„Dötadöm – à sotligné le presidënt Kompatscher – él preodü, dal 2015 inant, investimënć a bëgn di zitadins tl Südtirol de 144 miliuns de euro. L’ativaziun dl program FSE 2014 – 2020 piarà ia te döta l’Europa tl 2015 y sciöche Provinzia de Balsan sunse stà bugn da dè jö nosc program operatif por le terminn preodü. Śëgn saràl Brüssel che messarà analisé daimpröma les mosöres che i ùn stabilì, por nes comuniché eventualmënter coreziuns da fà en acordanza cun i ofizi competënć dla Provinzia.“
I trëi pilastri dl program FSE prevëiga danter l’ater proieć por le mioramënt dles oportunitês de laûr y por la mobilité di lauranć, por le sostëgn de scomenciadies d’integraziun de grups emarginà tla sozieté, por la combatüda cuntra la meseria y les discriminaziuns y por le mioramënt dl’efiziënza dl’aministraziun publica.
rc
