Didatica linguistica integrada: Presentaziun dla Mapa 4 y 5 ai 19 de jenà
10 unitês didatiches por la 4a y la 5a tlassa dles scores elementares por l’educaziun linguistica integrada é le resultat de n grup de laûr metü adöm dal monn dla scora ladina, dl Université da Porsenù, dl IPL y dl Ćiamp Inovaziun y Consulënza dl Departimënt Educaziun y Cultura Ladina. Le resultat final gnarà presentè ai 19 de jenà a San Martin dales 16.
La didatica linguistica integrada é na metoda d’insegnamënt che ne é por les scores elementares ladines nia valch de completamëter nü, vëgnel bele insignè da plü agn n ora al’edema aladô de chësc prinzip didatich. La metoda d’insegnamënt dla didatica linguistica integrada se basëia dantadöt sön le stüde dles desfarënzies y comunanzes di sistems linguistics desvalis por scemplifiché l’insegnamënt di lingać te n contest plurilingula. „L’educaziun linguistica integrada é na metoda de coordinamënt dl insegnamënt plurilingual che la scora ladina adora bele cun suzès y che dëida da reconësce les desfarënzies danter i ćiamps linguistics desvalis por favorì y alisirè la conescënza personala di lingać, l’interculturalitè y la capazité da passè saurì da un en lingaz al ater“, insciö l’assessur por la scora ladina Florian Mussner. Da plü agn ti vëgnel inće pité ai insegnanć la poscibilité da aumentè les conescënzes de chësta metoda d’insegnamënt tres na formaziun y consulënta spezifica da pert di professurs Cathomas y Carigiet.
Na grupa de insegnanć dles scores elementares, studënć dla facolté de Sciënzes dla Formaziun dla Université de Balsan/Porsenu y na grupa de laûr dl Istitut Pedagogich Ladin y de Ćiamp Inovaziun y Consulënza dl Departimënt Educaziun y Cultura Ladina à porchël laurè fora na seria de unitês didatiches por la linguistica integrada che é gnüdes ajornades aladô de critêrs scientifics y didatics. La presentaziun di resultać y dla mapa cun les 10 unitês didatiches por la 4a y 5a elementara gnarà insciö tignida
ai 19 de jenà dl 2015
dales 16
tl salf di stödafüch
a San Martin de Tor
en presënza dl’assessur por la scora ladina Florian Mussner, dl intendënt Roland Verra y dl diretur de Inovazion y Consulënza Felix Ploner. La presentaziun dl material didatich nü gnarà tignida dala colaboradëssa Claudia Rubatscher. Dertan la presentaziun saràl da odëi döt le material atual co reverda le plurilinguism, dala scolina ala scora alta.Te chësta ocajiun él vigni insegnant/a che ciafarà la mapa dl material didatich por l’educaziun linguistica integrada. La presentaziun gnarà reconesciüda ai fins dl ajornamënt.
L’invit é gnü injuntè. Plü informaziuns pon ciafè sön: www.pedagogich.it
rc
