Alisiraziuns IRAP: Impuls por le setur dl laûr – Degügn tais ti atri seturs
I 88 miliuns de euro dla cuta IRAP che les aziëndes dl Südtirol paiarà demanco tl 2015 gnarà registrades dala Provinzia sciöche n smendrimënt dles entrades, mo porchël ne saràl degügn tais di finanziamënć te d’atri seturs. „I ùn bele calcolè ite la diminuziun dles entrades de 88 miliuns de euro che gnarà recuperades tres la dotaziun dër alta dl fonds de rotaziun“, insciö le presidënt Kompatscher.
N’aziënda artejanala tipica dl Südtirol cun cater lauranć sparagnarà tl 2015 plü co 5.000 euro dla cuta IRAP en confrunt al 2014. „De chësc alisiramënt podarà s’anuzè dötes les impreses dl Südtirol, al sarà automatich y zënza degun pëis burocratich por les aziëndes“, insciö Kompatscher che sotlignëia la gran dimenjiun de chësta soma conscidran che le 40 porcënt di contribuć provinziai ne röia nia sura i 2000 euro.
Les rajiuns por l’alisirisamënt é döes: da öna na pert vëiga la lege de stabilité danfora che al vëgn arbassè la basa de calcolaziun por l’IRAP. Tl dagnì podarà insciö les aziëndes trà jö dala basa imponibla IRAP i cosć por i lauranti a tëmp indeterminé. La secunda rajiun é gnüda aprovada incö (13/01) dala Junta provinziala y comporta la renunzia dla poscibilité da aumentè les alicuotes IRAP provinziales. „La lege de stabilité prevëiga la poscibilité da aumentè l’IRAP, la Junta provinziala à indere stabilì incö da ne adorè nia chësta mosöra cun la conseguënza che i 88 miliuns de euro ti jarà diretamënter ales aziëndes“, à sotligné le presidënt dla Provinzia Arno Kompatscher y à ajunté che chësta dezijiun fej pert dl orientamënt dla Junta provinziala da orëi arbassè le pëis fiscal por i zitadins y les aziëndes.
Tl 2015 romagn insciö tl Südtirol l’alicuota "normala" dl IRAP – sciöche preodü tl pachet di alisiramënć fiscai dla Junta ales impreses – dl 2,68% che é cotan plü bassa co tl rest dla Talia. Implü vëgnel laprò l’arbassamënt dla basa imponibla por mirit dla detraziun di cosć por lauranć tuć sö a tëmp indeterminé. „Chësta mosöra é na reconoscënza à dötes les aziëndes che à impiegać cun contrać a tëmp indeterminè“, insciö Kompatscher che sotlignëia che chësc alisiramënt é n impuls important por le svilup dl setur dl'econmia locala y dl marćé dl laûr.
Implü à le presidënt dla Provinzia confermè incö che al ne é nia preodü smendrimënć te d’atri seturs por compensè les entrades plü basses tres l’IRAP. „I ùn bele preodü chësta mosöra statala tl bilanz de previjiun y porchël metü da pert i mesi finanziars tl fonds de rotaziun“, insciö le presidënt Kompatscher. Tres chësc fonds podaràl gnì finanzié les entrades plü basses dl IRAP zënza messëi smendrì i mesi finanziars da d’atres perts.
rc
