Dessëgn de lege söl personal: Na reforma sön cater pilastri
Do l’acordanza arjunta tratan la tlausöra à la Junta provinziala aprovè incö (13/01) le dessëgn de lege che reverda la reforma dl ordinamënt dl personal. „L’aprovaziun da pert dla Junta porta a fin un di percursc prinzipai dl proiet dl’inovaziun aministrativa 2018“, insciö l’assessuria por l’aministraziun Waltraud Deeg.
Cun la löm verda da incö, mertesc ai 13 de jenà, da pert dla Junta ala reforma dl ordinamënt dl personal él gnü aprovè na mosöra de renovamënt dl ordinamënt dl personal dl’aministraziun publica. "Le dessëgn de lege aprovè incö é n früt dl dialogh danter i colaboradus y i partner soziai y che porta cun sè n adatamënt al mudamënt dles condiziuns demografiches, soziales, aministratives y legislatives. Nosc obietif é chël da avëi n’aministraziun publica efiziënta, trasparënta, asvelta, basada sön i rendimënć y resultać y orientada tl vers di zitadins y dles aziëndes“, insciö l’assessuria Waltraud Deeg, che à presentè incö i cater pilastri prinzipai dla reforma dl ordinamënt dl personal.
Un di pilastri zentrai dla reforma é la creaziun de na combinaziun positiva danter les generaziuns che laôra tl’aministraziun publica formada dal’esperiënza dles porsones che conësc da tröć agn le funzionamënt dl’aministraziun y dales idees nöies che röia adalerch dales generaziuns plü jones. „N stromënt che gnarà apliché te chësc contest sarà le pat dles generaziuns, cun le ponsionamënt de colaboradus che corespogn ales condiziuns stabilides por tó sö jogn“, insciö l’assessuria. N’atra mosöra sarà la creaziun de formes nöies de practicums tl’aministraziun provinziala. „Chësc inće deache i odun che la domanda do practicums é dër grana“, insciö Deeg.
Le secundo pilaster dla reforma se basëia sön na maiù relaziun danter la retribuziun y les prestaziuns y di resultać arjunć efetivamënter. „Por arjunje chësc obietif gnaràl cherié plü mosöres concretes adöm cun la colaboraziun di sindacać“, à splighé incö l’assessuria, che à definì sciöche le terzo pilaster na maiù flessibilité y mobilité di dependënć dl’aministraziun publica. „Na maiù mobilité é dantadöt n’ocajiun por le svilup y la formaziun personala di depedendënć“, insciö l’assessuria Deeg che à recordé te chësc contest che por geniturs cun mituns sot ai trëi agn y por impiegà che se fistidiëia de porsones nia autonomes él preodü na tlausola de proteziun.
Le cuarto pilaster reverda la funziun soziala dl’aministraziun publica sciöche datur de laur prinzial tl Südtirol. Dantadöt en confrunt dles porsones cun handicap y che vir te situaziuns de vita complicades. „Insciö él preodü da mëte a desposiziun 40 posć implü por posones cun handicap aldinfora dla planta organica dla Provinzia”, à sotligné l’assessuria Deeg. I colaboradus dess daldô ciafè la poscibilité da gnì tuć sö tl sorvisc provinzial, por liberè indô i posć por d’atres porsones. Do l’aprovaziun da pert dla Junta provinziala gnarà śëgn le dessëgn de lege de reforma dl’aministraziun publica tratè dala Comisciun legislativa inćiariada por passè daldô tl plenum dl Consëi provinzial.
rc
Galaria dales fotografies
(Foto: USP/ohn)
