Posć d’ateraje de Balsan y Desproch: grup de laûr stüdia les poscibilitês
Na colaboraziun danter i dui aeroporć de Balsan y Desproch é gnüda aprofondida inier (12 de jenà) a Balsan dal presidënt dla Provinzia Arno Kompatscher y dal assessur Florian Mussner cun l’assessuria tiroleja Patrizia Zoller-Frischauf, l’ombolta de Desproch Christine Opitz-Plörer y i capi dl post d’ateraje tirolej. N grup de laûr studiarà les poscibilitês de na cooperaziun.
Tla sentada dla Junta à le presidënt Kompatscher informè dl’incuntada d’inier tl aeroport de Balsan cun i rapresentanć politics y tecnics dl post d’ateraje de Desproch. I partezipanć é a öna che la stabilisaziun por dîalalungia de n aeroport regional se damana n gran impëgn, "mo i sun düć a öna che degöna destinaziun ne po renunzié a na infrastrotöra tan importanta sce ara ô romagne competitiva dîalalungia", à dit le presidënt Kompatscher do l'incuntada tl aeroport de Balsan. An à dantadöt baié de ciafè sö formes de cooperaziun poscibles – inće tl'otica dl'Euregio - por renforzè tramidui i posć d’ateraje y indiretamënter l'economia y le turism. "I sun tla fasa de svilup de n plann y porchël él important por nos da trà ite bele da śëgn inant l’aeroport de Desproch, por ti fà lerch a na strategia de win win", à ajuntè l'assessur Mussner.
Les poscibilitês concretes de cooperaziun gnarà esplorades tles proscimes edemes da n grup de laûr metü adöm da esperć de tramidui i posć d’ateraje y metü sö inier dala sentada. "L'atenziun prinzipala va a na cooperaziun dl trafich charter incoming", à detlarè le Presidënt. Le grup de laûr gnarà menè dai direturs di dui aeroporć, Mirko Kopfsguter (Balsan) y Marco Pernetta (Desproch), y por le Südtirol gnaràl metü sü dl diretur dla Repartiziun provinziala Mobilité Günther Burger y dal vizepresidënt de ABD Gianfranco Jellici. I resultać di aprofondimënć y les propostes concretes gnarà presentades ai ënć titolars y ai CdA di posć d’ateraje di dui raiuns.
Paralelamënter, sön inćiaria dla Junta provinziala, va inant le laûr por rové a n plann adatè por l'aeroport de Balsan aladô de chisc obietifs: garantì na miù adoranza, la maiù soportanza ambientala poscibla, coliamënć che funzionëia cun Roma y cuntra nord, le potenziamënt sciöche post d’ateraje incoming por le turism. "Na pröma boza de chësta strategia gnarà presentada ćiamò ćina forà", à stlüt jö Kompatscher.
USP
Galaria dales fotografies
