L’assessuria Stocker à anunzié le start dles rezetes digitales
Cun incö, jöbia ai 15 de jenà él piè ia na fasa nöia por ći che reverda la digitalisaziun dles prescriziuns di doturs tl Südtirol. Les rezetes scrites a man sön le papier dess gnì baratades fora vare por vare cun rezetes eletroniches. „Insciö saràl poscibl da dè inant les rezetes plü debota“, à sotligné l’assessuria Martha Stocker tratan la presentaziun a Balsan.
La rezeta digitala eletronica dess remplazè tl dagnì chëra sön papier; chësc dess scemplifiché y smendrì la dorada dl prozès de prescriziun de medejines. La rezeta digitala dess te n proscim vare deventè insciö n documënt varënt por l’esecuziun o rezeziun de n sorvisc prescrit. I zitadins ne arà insciö nia plü bria da portè la rezeta cöcena te apoteca, mo al bastarà jì a tó les medejines cun la cherta sanitara. Les informaziuns sön la rezeta messarà gnì scrites dai doturs de familia y di mituns te n sistem zentral tres chël che les informaziuns gnarà menades inant diretamënter y che podarà gnì lites y elaborades dai partners dl sistem sanitar sciöche les apoteches o i doturs spezialisà.
L’assessuria por la sanité Martha Stocker à sotligné che le scomenciamënt é fat: por le momënt él 100 di 340 doturs de familia y di mituns che scrì fora rezetes digitales. 20 dles 119 apoteches laôra bele cun le sistem nü. Cun i 15 de jenà vëgn la digitalisaziun svilupada tres plü inant.
N vantaje dl sistem nü dess ester chël che al po gnì evité fai de prescriziun pro la trascmisciun de dać anagrafics o pro l’esenziun dal tichet, à splighé incö le dotur de medejina generala Giuliano Piccoliori che s’anüza bele dl sistem digital. N ater vantaje tres Piccoliori é chël che i dać po gnì menà inant zënza interuziuns. Johannes Ortler dla Repartiziun Sanité à sotligné che d’atri vantaji dla digitalisaziun dles rezetes é le control di cosć y l’identificaziun di paziënć. „Al po gnì controlè tan de rezetes che é gnüdes scrites fora, canche la rezeta é gnüda damanada y tan tröp che döt à costè“, à recordè Ortler che à ajuntè che le sistem funzionëia a livel nazional y che les rezetes podess gnì incassades inće fora dl Südtirol.
„Cun chësc sorvisc sunse bugn da garantì plü segurëza por i zitadins y al porta para inće na scemplificaziun por l’aministraziun“, à sotligné Christian Steurer dl’Aziënda sanitara dl Südtirol. Ćina de jügn dl 2015 dess dötes les farmazies avëi azès ai sistems digitai y la formaziun di farmazisć dess ester stlüta jö, insciö Steurer. Por la fin dl 2015 dess insciö düć i doturs scrì fora les rezetes digitalmënter. Chësta regolamentaziun de digitalisaziun dles rezetes é na mosöra preodüda da normes nazionales.
rc
