L'assessuria Stocker sön le Dé mondial por migranć y profugs
En ocajiun dl Dé mondial por migranć y profugs ai 16 de jenà recorda l’assessuria Martha Stocker che les tematiches che reverda i profugs ne é nia estlusivamënter na sfidada locala dl Südtirol o de d'atres Regiuns, mo che reverda döta l’Europa y che po ma gnì davagnada lauran adöm. "Cun la pröma assistënza söl Prener y cater d’atres strotöres dunse nosc contribut", sotlignëia Stocker.
Le local de pröma assistënza söl Prener é n piće aiüt por i profugs che é sön le tru da süd a nord: al é na strotöra che ti pîta n alberch ai migranć te na situaziun de nezescité tratan les ores de permanënza, cun n sostëgn por les nezescitês primares y cun val’ informaziun d’ütl, recorda l’assessuria Stocker. Vigni dé él zirca 15 porsones che s’anüza dl local dlungia la staziun dla ferata y che vëgn metü a desposiziun dal Comun.
„Düć i Paîsc europeics é damanà da dè na man, deache la chestiun di migranć ne é nia ma na tematica locala mo europeica, che se damana soluziuns coletives“, ajunta Stocker. Por le momënt él la Provinzia che à, tres la Repartiziun Politiches soziales, cater strotöres por i profugs tl Südtirol: trëi a Balsan (l’ex-caserma Gorio ai Piani, la Ćiasa Sara a Haslach y la strotöra "Bagni di Zolfo") y la Ćiasa Arnika a Maran.
Tl 2014 él stè le Stat che à assegnè ala Provinzia de Balsan indöt 758 profugs, tl cheder dla repartiziun nazionala él ćiamo 175 migranć tles strotöres. D’atres 107 porsones à presentè na domanda d’asil diretamënter tl Südtirol, indöt él 302 porsones che à fat domanda d’asil y che é tles strotöres dl Südtirol. „Chëstes porsones é dötes te na situaziun dër ria, che i ne se podun gnanca s’imajiné. Ti dè na man por n dagnì plü dignitus é n sëgn de solidarieté umana“, à stlüt jö Stocker.
rc
