Agricoltöra y ambiënt: mësa torona cun Theiner y Schuler
Les chestiuns plü importantes che reverda l’agricoltöra y l’ambiënt podarà tl dagnì gnì tratades tres na mësa torona di rapresentanć dles istituziuns, dles categories y assoziaziuns interessades. La pröma incuntada é gnüda tignida da püch cun i assessurs Theiner y Schuler, che s’aôda „discusciuns davertes y soluziuns concordades“.
„I orun tratè adöm les tematiches plü importantes – à sotligné l’assessurs Richard Theiner y Arnold Schuler – por stlarì deboriada les posiziuns denant che al nasces polemiches por nia. I sun sigüsc che insciö saràl poscibl da avëi debatüdes plü concretes y ogetives, tres chëres che al sarà plü saurì da chiri y ciafè soluziuns adöm.“ La pröma mësa torona é gnüda metüda da jì da püch cun i dui assessurs, Richard Theiner y Arnold Schuler, y i suranstanć dles repartiziuns y di ofizi competënć, i rapresentanć dles assoziaziuns interessades tl setur dl’agricoltöra y forestala, cun inće i grups d’interès y organisaziuns atives por la sconanza dla natöra y dl ambiënt.
Le feedback da pert di partezipanć a chësta plataforma de discusciun nöia é stè positif, sciöche al vëgn inće confermè da Andreas Riedl dla Federaziun por la sconanza dla natöra y dl ambiënt: „I sun daverć a vigni sort de confrunt“, à splighé Riedl. Inće Leo Tiefentahler dla Lia di paurs valutëia positivamënter la scomenciadia: „Al é na forma de colaboraziun che vëgn bele adorada te nostes vijinanzes cun n barat d’informaziuns che é d’ütl por evité polemiches.“ Por Siegfried Rinner, diretur dla Lia di paurs dl Südtirol podéssel gnì traté en colaboraziun tematiches che reverda por ejëmpl les rëis de proteziun cuntra les granijiores, le sprinzé boacia, la relaziun danter ecologia y agricoltöra y l’aumënt de formaziun y consulënza sön chëstiuns ambientales .
La mësa torona sön l’agricoltöra y sön l’ambiënt gnarà metüda da jì regolarmënter, la proscima incuntada é insciö preodüda por i 9 de merz, olache al gnarà tratè plü tematiches contretes sciöche l’azessibilité dles munts, le sprinzé boacia te zones sot a sconanza, sciöche inće la chestiun dl Parch nazional dl Stelvio.
rc
