Educaziun linguistica: Material didatich nü favorësc le plurilinguism
Aumentè les competënzes linguistiches di scolars y sostignì le laûr di insegnanć: Na mapa cun 10 unitês didatiches por l’insegnamënt aladô dl’educaziun linguistica integrada é gnüda presentada incö (19/01) a San Martin de Tor: la material didatich nü fej pert de na seria de publicaziuns realisades por le sostëgn dla didatica linguistica integrada tles scolines y tles scores dles valades ladines.
Aumentè les competënzes linguistiches di scolars, sostignì le laûr di insegnanć, strotoré l’insegnamënt aladô dles tlasses scolastiches, favorì le plurilinguism y la multiculturalité: Chisc é i fins prinzipai dl’elaboraziun y dla publicaziun dla mapa nöia cun material didatich nü por l’educaziun linguistica integrada por la cuarta y la cuinta tlassa dles scores elementares.La mapa cun 10 unitês didatiches é gnüda presentada incö, lönesc ai 19 de jenà, dal assessur por la scora ladina Florian Mussner, dal intendënt ladin Roland Verra, dal diretur dl Ćiamp Inovaziun y Consulënza Felix Ploner y dala colaboradëssa Claudia Rubatscher ai insegnać y ales insegnates a San Martin de Tor.
La didatica linguistica integrada é na metoda d’insegnamënt che ne é por les scores elementares ladines nia valch de completamëter nü, vëgnel pö bele insignè da plü agn n'ora al’edema aladô de chësc prinzip didatich. „Le sistem paritetich dla scora ladina é le contest ideal por l’insegnamënt dla didatica linguistica integrada. Chësta metoda s’à desmostrè tl tëmp sciöche n meso dër ütl por imparè y confrontè contemporaneamënter plü lingać y por renforzè les competënzes linguistiches bele acuisides“, à sotligné l’assessur por la scora ladina Florian Mussner. Cun la publicaziun de material nü ti vëgnel metü a desposiziun ai insegnanć unitês didatiches ajornades che tëgn cunt de critêrs scientifics y didatics plü atuai por adorè la metoda te na manira sistematica y por motivé i mituns da odëi le plurilingusm sciöche na pert de süa identité, insciö l’assessur Mussner.
L’intendënt por la scora ladina Roland Verra à sotrissé che la publicaziun di materiai didatics é „l’arjunta de n travert che vëgn portè inant da tëmp che reverda la promoziun dl’alfabetisaziun plurilinguala tles scores ladines.“ Cun la publicaziun de material didatich por l’insegnamënt tles scores mesanes y altes dess le percurs gnì completè por avëi a desposiziun material de sostëgn dala scolina ales scores altes, insciö l’intendënt Verra. Inće le diretur dl Ćiamp Inovaziun y Consulënza Felix Ploner à recordè l'importanza de publicaziuns nöies por sostignì le model d'insegnamënt te plü lingać dla scora paritetica ladina.
Le material didatich nü fej pert de na seria de publicaziuns realisades en sostëgn dla didatica linguistica integrada tles scolines y tles scores dles valades ladines. Tl 2009 él gnü publiché na pröma seria de unitês didatiches dal titul "Material didatich por l'educaziun linguistica integrada 1.2.3.", tl 2013 él gnü presentè les plates de laûr por la scolina "Vari tl plurilinguism": la publicaziun nöia completëia insciö i mesi de sostëgn ćina la cuinta tlassa dla scora elementara. La publicaziun é früt dla colaboraziun danter insegnantes dla scora elementara, studëntes dla facoltè de Sciënzes de formaziun dl’Université da Balsan/Porsenù y rapresentanć dl Ćiamp Inovaziun y Consulënza dl Departimënt Scora y Cultura ladina. Deache la metoda ne é nia nöia él stè poscibl da coliè l’esperiënza dles insegnantes cun les conescënzes scientifiches y didatiches di esperć dl setur por la revijiun dl material nü.
I vantaji dl insegnamënt do la metoda dla didatica linguistica integrada é do l’arat de esperć cotanć: danter l’ater dëidara da confrontè i lingać un cun l’ater, da reconësce comunanzes y desfarënzies danter i sistems linguistics desvalis y da scemplifiché le passaje da un en lingaz a en ater. Cun chisc materiai ti vëgnel metü a desposiziun, insciö scri le Ćiamp Inovaziun y Consulënza, dles insegnantes/di insegnanć y dles scolares/di scolars la poscibilité da laurè sistematicamënter sön plü rujenedes, valorisan les competënzes arjuntes te n sistem linguistich coche basa por les svilup dles competënzes te n ater.
Plü informaziuns pon ciafè sön le sit: www.pedagogich.it
rc
Galaria dales fotografies
