Parch tecnologich, ecomobilité, insediamënć: Löm vërda al program dla BLS
La Junta provinziala à aprovè incö (20 de jenà) le program anual dla BLS – Business Location Südtirol – che reverda danter l’ater le markting dl teritore, le sostëgn a comuns y aziëndes pro insediamënć y pro le svilup de raiuns de produziun, la realisaziun dl parch tecnologich y le svilup dla mobilité eco-sostenibla.
Sciöche n’aziënda speziala dla Provinzia mëss la BLS – Business Location Südtirol - presentè tl scomenciamënt de vigni ann so program anual dles ativitês ala Junta provinziala. Le program anual por le 2015 é insciö gnü aprovè incö, mertesc ai 20 de jenà, dala Junta provinziala y prevëiga n budget de 6 miliuns de euro. "L'ativité prinzipala dla BLS reverda la mioraziun dles condiziuns dla posiziun dl comerz tl Südtirol tres ativitês sciöche le marketing dl teritore, le sostëgn a comuns y aziëndes pro insediamënć y pro le svilup de raiuns de produziun, la realisaziun dl parch tecnologich a Balsan, le svilup dla mobilité eco-sostenibla y la promoziun dl Südtirol sciöche „location“ por films", à splighé incö le presidënt dla Provinzia Arno Kompatscher.
Un di pilastri prinzipai dla BLS sarà insciö inće tl 2015 i sorvisc por les aziëndes y por i comuns por ći che reverda l’insediamënt de aziëndes nöies y le sorvisc de gestiun de raiuns de produziun. Implü é un di compić dla BLS chël da portè inant la realisaziun dl parch tecnologich a Balsan, olache l’obietif é chël da stlü jö i laûrs di frabicać che reverda l’area publica y le pröm modul por l’insediamënt dles aziëndes ćina le 2016.
N ater pilaster dl’ativité dla BLS reverda le svilup dla mobilité eco-sostenibla tl Südtirol. „L’obietif é chël da portè le Südtirol a ester n ejëmpl de mobilité eco-sostenibla alpina. Tl 2015 gnaràl insciö laurè inant sön le renforzamënt dla mobilité eletronica, n vare concret sarà la realisaziun de staziuns por ćiariè auti eletrics sön la linia dl Prener danter Sterzing y Egna“, à sotligné le presidënt Kompatscher. Implü laôra la BLS sön la defujiun de auti eletrics tres n proiet dl’Uniun Europeica por aumentè la presënza di auti eletrics ti Comuns, tles aziëndes, tles aziëndes logistiches y comunales. La BLS fej inće pert dl proiet de inrescida „Elektromobile Stadt/Città elettromobile“ por l’integraziun dla mobilité eletrica tles citês y ti comuns.
Le presidënt dla Provinzia Arno Kompatscher à implü recordè incö che chësc contrat de sorvisc cun la BLS sarà l’ultim te chësta forma, deache cun le 2016 saràl en funziun l’Aziënda de sorvisc speziala dl Südtirol cun l’unificaziun dla BLS cun l’EOS, la SMG y le TIS te öna n’aziënda.
rc
