Imparè da conësce l’UE cun l’Alpeuregio Summer School
Imparè da conësce l’Uniun Europeica y les istituziuns europeiches diretamënter söl post: Inće chësc ann él la rapresentanza europeica dl’Euregio Südtirol-Tirol-Trentin che ti pîta la poscibilité a jogn laureà y a studënć da inrescì diretamënter söl post le funzionamënt dles istituziuns dl’Uniun Europeica tres l’Alpeuregio Summer School.
Inće por chësc ann é la rapresentanza unitara dles trëi provinzies dl Südtirol-Tirol-Trentin a Brüssel stada buna da mët adöm n program cun reladus che à cariches importantes al’intern dl’UE y che presentarà tematiches che reverda les istituziuns y le funzionamënt dl’UE, la storia dl’integraziun europeica, le laûr de lobbying a livel europeich, le marćé intern dl’UE y les politiches prinzipales dl’UE.
Le fin dl proiet de formaziun "Alpeuregio Summer School" é chël da coliè les conescënzes teoriches dl stüde sura la politica dl’Uniun Europeica cun n’esperiënza direta tles istituziuns europeiches söl post a Bruxelles. Le curs vëgn metü da jì dai 22 de jügn ai 2 de messè tres le Grup europeich de cooperaziun teritoriala (GECT) dl’Euregio cun n numer de 30 posć a desposiziun. Fà domanda po düć i laureà dal Südtirol, Trentin y Tirol y, por le pröm iade, inće i studënć tl terzo ann de stüde che à stlüt jö almanco un n ejame che reverda l’Uniun Europeica. Le curs sarà por inglesc.
La bandida dl concurs por la partezipaziun al’Alpeuregio Summer School 2015 gnarà publicada ćina mez forà sön la plata internet dla rapresentanza dl’Euregio a Brüssel (www.alpeuregio.org). Ai partezipanć dl Südtirol él la Cassa de Sparagn che ti dà n contribut de 300 euro por la curida dles spëises dl iade y de sojornanza, che i partezipanć mëss curì instësc, le curs indere é debann.
rc
