N ann de suzès por i Museums provinziai
Plü mostres speziales, söporjö 800.000 vijitadus, ofertes por mituns y families, vijites tematiches, proieć d’inrescida, publicaziuns scientifiches y referać: l’Aziënda „Museums provinziai“ à organisé tratan l’ann 2014 plü scomenciadies y proieć che à confermè le gran interès de pići y gragn, sciöche inće dla jënt dl post y turisć.
Inće por le 2014 él l’Aziënda Museums provinzai che po ciarè zoruch cun sodesfaziun al numer de porsones che à vijité les 15 sëntes di museums provinziai tl Südtirol. L’oferta di museums é basada sön i interesc di zitadins locai y di turisć dl Südtirol y che ti pîta, a pici y gragn, n program cun tröpes ativitês y novitês. Indöt él gnü registré tl ann passè 800.000 vijitadus (plü avisa 795.839), che à tut pert ales scomeciadies, ales mostes y ales ofertes di museums tratan l’ann. Cun chësta zifra él stè meso da tignì costant le numer di vijitadus en confrunt al 2013 y chësc desmostra che l’oferta y les ativitês metüdes da jì ti museums vëgn aprijiades y anuzades. „I museums provinzai é istituziuns culturales y d’inrescida inovatives che pîta momënć d’informaziun, reflesciun y aorela cörta por pići y gragn“, spliga l’assessur por i museums Florian Mussner che à sotligné che l’obietif di museums dl Südtirol sará ti proscims agn da aumentè l’oferta por la popolaziun locala, les families, i jogn y i scolars. Dötes les manifestaziuns che i museums à por i jogn y scolars pon inće lì do sön le portal internet nü www.museen-suedtirol.it/youngmuseum.
„Inće tratan la palsa da d’invern laôra i museums provinzai – sotlignëia la direturia dla Repartiziun Museums provinzai Karin Dalla Torre - sön la planificaziun dles scomeciadies dl ann nü. Cun la mostra speziala sön Robert Musil tl contest dla Pröma vera mondiala él pié ia l’ann passè na ligna de manifestaziuns y mostres sön la pröma vera mondiala che gnará portades inant tl 2015 cun mostres nöies tl Touriseum, tl Museum Ladin y tl Museum dles usanzes y tradiziuns“, insciö la direturia Dalla Torre.
Öna dles scomenciadies prinzipales dl Museum Ladin „Ćiastel de Tor“ é stada por l’ann 2014 la mostra „La cör dla ćiasa – la stüa dla Val Badia“ che à tematisé l’importanza cultura, soziala y storica dla stüa sciöche post prinzipal de racoiüda dles families dla Val Badia. Sciöche cornisc dla mostra él inće gnü realisé n catalogh che contëgn n’inrescida storica y etnografica cun indöt 170 plates. La mostra „Le cör dla ćiasa – La stüa tla Val Badia“ podarà ćiamò gnì vijitada ćina ai 05 de aurì dl 2015. N’atra scomenciadia che le Museum Ladin Ćiastel de Tor à metü da jì por le 2014 é stada la mostra de 350 chertes postales de Carlo Pescollderungg che va zoruch tl tëmp dla fin dl 18ejimo secul y che röia amesa le 20ejimo secul. Implü él inće gnü organisé, en colaborzaiun cun le Museum Ladin Ursus ladinicus, scomenciadies aposta por les families.
Le Museum Archeologich à dediché tl 2014 danter l’ater la mostra speziala „FORZEN STORIES“ ai dlacià che é da odëi ćina ai 22 de forà dl 2015. Interessant é le fat che le museum é gnü vijité tl 2014 da porsones de indöt 55 naziuns. Le Museum Natöra à dediché na pert dles mostres dl 2014 ales carateristiches de ogeć museai. Implü àl presentè les mostres fotografiches „Schöne Verwüstung“ dl fotograf american Henry Fair y „Lëdi y salvari“ dl fotograf Florian Schulz che tematisëia le mantignimënt dla biodiveristé tles Alpes tres fotografies sön i spostamënć de tiers salvari tl’America (la mostra é ćiamò da odëi ćina ai 13 de setëmber dl 2015). N ann plëgn de evënć à inće albü le Touriseum che à realisé na publicaziun nöia sön l’incuntada „Vera y turism“ tl novëmber 2013. Le Museum dles mineores à dediché öna de sües mostres prinzipales dl 2014 al laûr y les fadies dles ëres tles mineores. Por le pröm iade à le Museum dles usanzes y dles tradiziuns metü a jì tl 2014 le Dé dles erbes che à presentè plü tematiches dl monn dles erbes. Le Museum dla ćiacia y dla pëscia s’à dè jö cun tl 2014 danter l'ater cun la danza tl tëmp dl baroch y le Museum dl vin à organisé l'ann passè plü conzerć olache al é stè meso da liè le vin cun l’ert y la musiga. Tl 2014 él inće gnü integrè le Museum storich – cultural de Ćiastel Tirol tl’Aziënda Museums provinziai, olache al é gnü organisé tl 2014, danter l’ater, la mostra speziala „Der Gesang des Todes“ che à tratè la relaziun danter la vita y les creaziuns leterares dl scritur austriach Robert Musil tratan y do la pröma vera mondiala.
rc
