Families: Incuntada por laurè sön na strategia de prevenziun
Laurè adöm por formè families plü stersces: chësc é un di obietifs primars dla Provinzia tl ćiamp dles politiches por les families, n travert che an porvarà da arjunje tres formes de colaboraziun trasversales y cun na rëi de laûr ampla che tol ite dötes les perts interessades. Cun chësc fin à l’assessuria Deeg organisè incö n’incuntada cun 70 rapresentanć dl monn sozial, sanitar y dla formaziun.
„Acompagné les families tratan vigni passaje dla vita: chësta é öna dles oblianzes prinzipales che gnarà inserida tla lege provinziala nöia“, cun chësta premissa à l’assessuria por les families Waltraud Deeg metü man incö, jöbia ai 29 de jenà l’incuntada cun zirca 70 rapresentanć dl monn sozial, sanitar y dla formaziun por planifiché adöm na strategia de prevenziun por le bëgn dles families. La sentada é gnüda anuzada dal'assessuria Deeg por presentè so conzet de strategia pedagogica che à le fin da sostignì n svilup dles families „sann“ y che dess gnì arjunt cun l’aiüt de dötes les perts interessades. „La tematica dla familia y i ambić d’intevënt reverda na gran cuantité de sorvisc, ofizi, ënć publics y privać“, à sotligné l’assessuria Deeg che à recordè che les iniziatives te chësc ćiamp é bele tröpes y che tres na coordinaziun plü ampla dles perts interessades saral poscibl da evitè plü saurì sorvisc dopli y da laurè deplü adöm.
N pröm vare te chësc vers é le fat che le proiet „Families plü stersces“ vëgn coordiné te na manira coletiva dal Departimënt Familia adöm cun i Departimënć dl’Istruziun y Formaziun di trëi grups linguistics y cun la Repartiziun Sanité. „La parola tlé – à splighé la coordinadëssa Gudrun Schmid - dess ester la prevenziun. I geniturs mëss gnì daidà adora assà, te na manira che ai sides bugn da s’arjignè ca ales sfides canche ares se presentëia.“ Por mët en pratica chësc conzet él preodü la costruziun de trëi ćiamps d’intervënt: dala gravidanza ćina ai trëi agn, la puberté y les sitaziuns che taca adöm cun la separaziun.
Do les paroles de introduziun é le dé jü inant cun la creaziun de grups de laûr sön les tematiches plü desfarëntes. I resultać dles discusciuns é gnüs coiüs adöm por i adorè daldô tratan le svilup dla strategia de prevenziun. Al'incuntada à tut pert indöt sura 70 partezipanć de istituziuns y assoziaziuns dl monn sozial, danter l’ater inće i direturs de Departimënt Peter Höllrigl, Stefan Wlader, Vera Nicolussi Leck y le diretur dl’ASSE Eugenio Bizzotto.
rc
Galaria dales fotografies
