Parch tecnologich nü: I laûrs de costruziun mët man de merz
Le parch tecnologich nü dl Südtirol, che gnarà fat sö sön l’areal dl ex-Alumix a Balsan Süd, é rové tla fasa de realisaziun. Le parch arà l’inom de NOI – Nature of Innovation – y pitarà alberch por aziëndes d’inovaziun, istituziuns d’archirida y ënć de formaziun. Le conzet, l’inom y l’orientamënt dl proiet é gnüs presentà incö dal presidënt Kompatscher adöm ai direturs dla BLS y TIS.
„Le parch tecnologich nü de Balsan Süd é n investimënt important por aumentè l’atrativité dl Südtirol y por ti pité ales aziëndes locales y ai istituć d'archirida la poscibilité da laurè adöm sön le svilup de conzeć inovatifs“, à sotligné incö (02 de forà) le presidënt Arno Kompatscher tratan la presentaziun dl inom y dl conzet de basa dl Parch tecnologich che é gnü a se l’dè tres la colaboraziun cun les assoziaziuns economiches dl Südtirol. „Les esperiënzes da d’atres realtês nes mostra che na strotöra sciöche chësta é n impuls fondamental por l’inovaziun dles aziëndes y por aumentè la competitivité dla regiun. Le parch tecnologich dl Südtirol sarà n post olache les aziëndes y les istituziuns de archirida podarà laurè adöm, cun la garanzia da imparè un da l’ater y da miorè insciö les condiziuns generales dl Südtirol sciöche location por n’economia inovativa y moderna“, à sotrissé Kompatscher.
Le presidënt dla Provinzia Arno Kompatscher à informè inant, che do da mëisc de intardiades por gaujia de recursc, él stè poscibl da ti assegné chisc dis i laûrs al’assoziaziun temporana dles imprejes (A.T.I.) dla Volcan che metarà man cun la costruziun dl pröm modul tl mëis de merz. Le pröm modul contëgn le ressanamënt dl frabicat prinzipal (Ex-Alumix) y la costruziun de n frabicat nü, che arà na forma architetonica de somianza ales zentrales d’eletrizité di „Aluminiumwerke“ tl stil Bauhaus che é sot a sconanza. „Al sarà n punt de coliamënt danter le tëmp passè y le dagnì“, insciö l’architët Josef March, coordinadù dla progetaziun di laûrs por la BLS. La realisaziun dl pröm lot, sciöche inće chëra dl secundo che prevëiga le ressanamënt dl secundo frabicat prinzipal por l’insediamënt dla gran pert di laboratori, dess gnì stlüć jö por la fin dl ann 2017. Ćina le 2017 gnaràl inće stlüt jö le terzo frabicat prinzipal che é planifiché sciöche alberch dles sëntes de aziëndes y imprejes.
L’inom nü dl parch tecnologich é NOI, n’abreviaziun dla denominaziun de posizionamënt dla direziun „Nature of Innovation“. „N grup de laûr à elaborè n conzet che mët l’inovaziun al zënter y tol la natöra sciöche ejëmpl“, à splighé Ulrich Stofner, diretur dla BLS. Chësc inće por garantì l’orientamënt y i sorvisc dl parch technologch NOI che sarà adatà ales esigënzes spezifiches dles aziëndes. „L’inom Noi contëgn inće döes interpretaziuns locales, da öna na pert le „noi“ talian y dal’atra pert le „noi“ dla varianta todëscia dl Südtirol che ô dì 'nü' ", insciö Stofner.
Les cater istituziuns d’archirida dla Université da Balsan, l’Academia europeica de Balsan (EURAC), le Frauenhofer Innovatiun Engineering Center (IEC) y l’Agenzia ĆiasaTlima arà süa sënta tl parch tecnologich che ti pormetarà da laurè te na relaziun strënta cun les aziëndes. Inće le TIS arà süa sënta tl parch tecnologich. Le Zënter de sperimentaziun dla Laimburg y la ECO Research arà n’ofize de rapresentanza tl Techparch Alto Adige.
„Implü é la costruziun de 21 laboratori por l’archirida te ćiamps che reverda les tecnologies vërdes, alpines, d’alimentaziun y dl’automaziun bele tla fasa de progetaziun“, à splighé le diretur dla TIS Hubert Hofer. Dlungia ala costruziun di 21 laboratori planificà gnaral inće integrè tl conzet atri laboratori che reverda l’ambiënt, la sanité y la medejina bio.
La spersa plü grana dl NOI reverda i moduls d’ampliamënt, por chi che al é preodü na cubatura mascimala de zirca 750.000 metri cubic. La costruziun de frabicać te chisc moduls é diretamënter proporzionada ales domandes che röia ite. „Le conzet de costruziun taca dër adöm cun les scomenciadies de privać: al gnarà ma fat sö sce al é inće interès da pert di privać“, insciö le presidënt Kompatscher. Düć chi che ô avëi la sënta tl parch tecnologich messarà avëi carateristiches spezifiches: al gnarà valuté le livel d’inovaziun dl’aziënda, le reputaziun y la sconanza ambientala dles ativitês y les conseguënzes por le teritore“, insciö Hubert Hofer. Döes de gran imprejes a livel internazional (Maccaferri y Senfter) à bele stabilì da laurè y inrescì tl parch tecnologich, implü él 20 aziëndes che à fat domanda por na sënta tl parch tecnologich.
Les propostes por la costruziun dl Techparch nü de Balsan é gnüdes svilupades dai davagnadus dl concurs dl 2007, la Chapman Taylor de Milan y la CLEAA Claudio Lucchin & architëć assozià de Balsan.
rc
Galaria dales fotografies
