Cun les tecnologies nöies é les spëises dla posta jüdes zoruch
L’Aministraziun provinziala à menè fora tl ann passè 580.891 comunicaziuns tres la posta cun na spëisa de zirca un n miliun de euro. Tl 2012 êl ćiamò gnü menè fora le dopl dles comunicaziuns, cun n cost de 1,35 miliuns. „Por merit dl’adoranza de na plataforma digitala él stè poscibl da smendrì tresfora les spëises dal 2013 inant“, sotlignëia l’assessuria provinziala Waltraud Deeg.
Posta prioritara, material informatif sön i sorvisc publics, racomandates, notifiches de sanziuns y la trasmetüda de autorisaziuns (danter chëstes inće la patent): por ći che reverda les comunicaziuns danter l’Aministraziun publica y le zitadin à la Provinzia dè fora indöt 1,1 miliuns de euro. La maiù pert dles informaziuns é gnüda menada fora tres la posta ordinara y – tres le potenziamënt dla tecnologia digitala – él stè poscibl insciö da smendrì dl 50 porcënt les comunicaziuns scrites en confrunt al ann 2013 cun na spëisa che é jüda zoruch da 755mile a 546mile euro, inće sce les spëises por i martli é aumentades.
„Nosta intenziun é chëra da invié le plü che ara va les comunicaziuns tres la posta zertificada o tres via telematica, inće por aumentè l’adoranza dles plataformes digitales por la trascmisciun dles documentaziuns ala Posta“, à sotligné l’assessuria por l’aministraziun Waltraud Deeg. La Provinzia ne se crüzia nia plü diretamënter dla stampa y dles prozedöres de trascmisciuns dles lëtres y dles comunicaziuns de retüda, deache chisc sorvisc é gnüs assegnà a organisaziuns esternes. Insciö él inće poscibl da smendrì i tëmps de speta dles comunicaziuns cun terminns da tignì ite. Tl ann passè él gnü menè tres chësta metoda 48 mile lëtres y por chësc sorvisc à la Provinzia paié indöt 78 mile euro.
rc
