Cooperaziun al svilup: La Junta provinziala à aprovè le program por le 2015
Plü co 2 miliuns de euro investësc la Provinzia de Südtirol chësc ann por la cooperaziun al svilup. En confrunt al ann passè é la soma de sostëgn gnüda alzada dl 10 porcënt. Trëi cherć dla soma va a bëgn de organisaziuns y assoziaziuns che mët a jì proieć de cooperaziun al svilup. La Junta provinziala à aprovè incö (03 de forà) le program por le 2015.
L’ann 2015 é gnü protlamè dala Uniun Europeica sciöche l’ „ann dl svilup“ y cun le moto „nosta tera, nosta dignité, nosc dagnì“ él inće la Junta provinziala de Südtirol che ô dè so contribut. Insciö à la Junta provinziala aprovè incö, mertesc ai 3 de forà, sön proposta dl presidënt dla Provinzia Arno Kompatscher le program anual por la cooperaziun al svilup por le 2015. „La solidarieté umana y la cooperaziun al svilup é n dovëi por düć nos y porchël unse aumentè chësc ann i mesi finanziars a desposiziun te chësc setur“, à splighé le presidënt Kompatscher che à recordè che pro l’adoranza y la destribuziun di mesi finanziars él da tignì ite regoles y standarg tlers.
Le budget complessif di mesi finanziars che la Provinzia mët a desposiziun chësc ann por la cooperaziun al svilup é de 2.048.000 euro. Cun chëstes ressurses vëgnel finanzié dantadöt proieć y programs de cooperaziun al svilup ti Paîsc dl Africa, dl Asia, dl America Latina y dl Europa dl Est, mo inće proieć de sensibilisaziun tl Südtirol. Implü él na pert dles ressurses che vëgn metüda a desposiziun por la proteziun dles mendranzes y por situaziuns de desgrazies y conflić cun situaziuns d’emergënza por les popolaziuns atocades.
La maiù pert dl budget, zirca le 75 porcënt, vëgn metü a desposiziun por assoziaziuns y organisaziuns che mët a jì proieć de cooperaziun al svilup y aziuns de sensibilisaziun. Ćina la fin de jenà à les organisaziuns interessades albü tëmp da dè jö sü proieć por chësc ann, y che gnarà śëgn valutà da na comisciun por spartì sö i finanziamënć do na lista de prioritês prestabilides.
La pert dl budget che romagn (le 25 porcënt, 512.000 euro) é preodüs por programs de svilup che vëgn metüs da jì dala Provinzia diretamënter cun partners söl post o inće cun organisaziuns internazionales. I Paîsc prinzipai olache al gnarà sostignì proieć sarà Burkina Faso, Uganda, Tansania, Nepal, Bolivia, Ecuador o Cap Verde. Tl setur dla proteziun de mendranzes gnaral sostignì n program d’agricoltöra y la costruziun de n alberch por studënć por la popolaziun tibetana tl India. Implü dessel gnì sostignì la publicaziun dl manual „Dërć dles mendranzes te Europa“ y la seria de reportajes „Minet“ sciöche inće finanzié mosöres d’emergënza tles Filippine, Gaza, Sierra Leone y tla Bosnia. La „segurëza alimentara“, tematica zentrala dl EXPO 2015 de Milan, gnarà inće analisada cun proieć de sensibilisaziun y de formaziun.
rc
