Proiet eGov tles scores: incuntades a Balsan, te Gherdëna y tl’Alta Badia
La ligna de incuntades dl proiet „eGov meets schools“ va inant tles proscimes edemes cun incuntades danter i studënć, professurs y l’Aministraziun publica cun le fin da presentè te scores altes desvalies te Südtirol i sorvisc y les poscibilitês che l’Aministraziun publica ti pita a sü zitadins online. Les proscimes tapes sarà les scores altes te Gherdëna, tla Val Badia, a Maran y Porsenù.
„Do le scomenciamënt dl proiet tl lizeum por les scienzës soziales a Bornech tl mëis de dezëmber – spliga l’assessuria provinziala por l’informatica Waltraud Deeg – él stè plü istituć scolatics che à mostrè interès al proiet y insciö unse capì che i laorun tla dërta direziun.“ Le proiet à sciöche obietif chël da ti presentè ai studënć i sorvisc digitai dl’Aministraziun publica y da ti mostrè sö tl medemo tëmp i vantaji che les tecnologies nöies porta cun sè te chësc setur.
Ti ultims dis él gnü tignì presentaziuns te döes scores de Balsan, le lizeum scientifich „Peter Anich“ de via Fago y te chël por les sciënzes soziales te via Roen. I studënć y professurs à mostrè gran interès por les materies che ti é gnüdes presentades: l’eGovernment, l’identitè digitala, l’oferta online di sorvisc provinziai y nazionai y valgügn aspeć dla segurëza informatica. „Dantadöt sön la segurëza di dać y dla privacy él gnü fat tröpes domandes dai scolars do la contlujiun dla presentaziun, – à splighè le proiet manager Paolo Perrucatti – inće deache i jogn adora dantadöt i social media por comuniché sües ativitês da vignì dé y ô insciö gnì informà sön les conseguënzes y prighi eventuai che la comunicaziun oline porta cun sè.“
Le diretur dla Repartiziun Informatica Kurt Pöhl à anunzié la poscibilité da „amplié le proiet a plü scores sön döt le Südtirol tl proscim ann scolastich, inće por mirit dla buna colaboraziun cun les trëi intendënzes che à bele mostrè chësc ann na sensibilité particolara por le proiet.“ La scomenciadia, che fej pert dl contest Südtirol Digital 2020, prevëiga atres incuntades tl mëis de forà te Gherdëna, tla Val Badia, a Maran y Porsenù.
rc
