Reforma sanitara: Löm vërda dala Junta provinziala
Sön indöt 30 plates él gnü metü jö la strategia por le svilup dl’assistënza sanitara tl dagnì te Südtirol. Le documënt é gnü aprovè incö (10/02) dala Junta provinziala y „rapresentëia – insciö à splighé incö Kompatscher y Stocker – la basa de na reforma dl sistem sanitar che à sciöche obietif chël de assiguré i standarg de cualité dles prestaziuns sanitares inće tl dagnì por döta la popolaziun."
Le presidënt dla Provinzia Arno Kompatscher à sotrissé incö (10/02) tla conferënza stampa do la sentada dla Junta che „la reforma dla sanité é na reforma ampla, de dorada lungia y por valgügn aspeć inće radicala. Al’assessuria Martha Stocker ti él garatè da restè coerënta, da mët a jì n cambiamënt de mentalité zënza avëi smendrì la cualité“, insicö Kompatscher.
La strategia dla reforma sanitara aprovada incö (10 de forà) dala Junta provinziala se basëia insciö sön cater pilastri y à sciöche fin prinzipal chël da potenzié l’assistënza sanitara sön le teritore: te na manira ćiamò plü azentuada, en confrunt a incö, dess les prestaziuns plü importantes gnì renforzades diretamënter sön le post cun n aumënt di standarg cualitatifs. Chësc obietif dess gnì realisé tres n’ampliamënt di sorvisc da pert di doturs de basa, che podarà s’anuzé tl dagnì de na rëi ampliada y ćiamò plü sterscia cun i sorvisc soziai y sanitars inće por ći che reverda l’acompagnamënt y la cura dantadöt de amarà cronics.
Le secundo pilaster dla reforma sanitara reverda la garanzia de n dagnì por i set ospedai dl Südtirol. I ospedai di raiuns gnarà reorganisà cun n renforzamënt dla colaboraziun danter vëi tres le prinzip de ’un n ospedal cun döes sëntes’. „Les strotöres ti ospedai gnarà reorganisades tres na colaboraziun danter i dui ospedai dl medemo raiun che prevëiga che les staziuns de un n ospedal messarà curì i medemi sorvisc dl ater ospedal che taca adöm y gnarà manajades da un n primar sù“, à splighé l’assessuria Stocker. L’oferta de prestaziuns sanitares podarà insciö gnì garantida inće tl dagnì y metüda a desposiziun di zitadins te formes desvalies: chësc ô dì che ti ospedai de Solaneres, Sterzing y Sanćiana gnaràl integré l’oferta de sorvisc che reverda i day hospital y l’ambulatore cun döes repartiziuns cun leć de medejina generala y de chirurgia ortopedica, sciöche inće cun n sorvisc de pröm intervënt 24 ores sön 24. Ti ospedai da Maran, Porsenù y Bornech saràl indere da ciafè plü repartiziuns stazionares. Tl ospedal da Balsan gnaràl garantì en ajunta (mo nia ma a Balsan) i sorvisc che se damanda do na spezialisaziun alta por intervënć complicà.
La reforma vëgn sostignida implü da dui d’atri pilastri: da öna na pert gnaral reorganisé la direziun y la strotöra aministrativa cun n smendrimënt dla burocrazia y na scemplificaziun dles prozedöres y dal’atra pert gnaràl ciarè da otimisé l’organisaziun aziendala y i prozesc che alda laprò. Danter les mosöres preodüdes él inće la creaziun de n sistem informatich unitar a livel provinzial.
La Junta ti à dè l’inćiaria al’assessuria Martha Stocker da arjigné ca i proscims vari. Por jügn dessel gnì stlüt jö la proposta de reorganisaziun dl sorvisc sanitar, spo podarà i laûrs pro le plan sanitar nü dla Provinzia mët man. Implü gnaral nominé tl mëis de mà le diretur general nü o la direturia generala nöia dl’Aziënda sanitara dl Südtirol.
L’Assessorat por la sanité a metü man cun l’elaboraziun de na reforma por la reorganisaziun dl’assistënza sanitara dl Südtirol da d’aisciöda dl 2014, cun l’aprovaziun dla deliberaziun da pert dla Junta él gnü aprovè incö la basa por la reforma dla sanité. „La dorada dl’atuaziun dla reforma prevëiga almanco cinch agn, i laorun por atué les mosöres prinzipales ćina le 2020“, à stlüt jö l’assessuria Stocker.
rc
