Fonds por i comuns confinanć: prozedöra nöia, plü pëis por Balsan y Trënt
Na bandida dopla cun plü pëis por les Provinzies de Balsan y Trënt é le resultat dl’incuntada de incö danmisdé (11 de forà) a Roma, a chëra che le presidënt dla Provinzia Arno Kompatscher à tut pert y che reverda na metoda de devijiun nöia dl fonds por i comuns confinanć, cun chël che al vëgn sostignì proieć de comuns che confinëia cun les döes Provinzies.
Do l’acordanza arjunta tl mëis de setëmber dl ann passè sön le sostëgn tres les fonds de sostëgn danter le Govern nazional, la Lombardia, le Venet y les Provinzies de Balsan y Trënt, pol śëgn pié ia la fasa concreta che reverda la devijiun di finanziamënć. Le presidënt Arno Komaptscher à tut pert incö (11 de forà) a na pröma incuntada a Roma, tratan chëra che al é gnü tut la dezijiun da recuperé le tëmp pordü ti ultims agn tres na prozedöra de na divijiun dles ressurses aladô de döes bandides de finanziamënt desfarëntes.
Le Comitê paritetich por la gestiun dles ressurses finanziares, cun a ćé le parlamentar belunej Roger De Menech, à dè insciö löm vërda por döes bandides (vignöna cun 24 miliuns) che reverda i 48 miliuns dl fonds che é gnüs metüs da pert por le 2013 y 2014: chëstes ressurses finanziares podarà ma gnì anuzades dai 48 comuns che à sü confins diretamënter con les provinzies de Balsan (6) y de Trënt (42). I proieć che gnarà sostignis tres le Fonds podarà gnì co-finanzià cun n'investimënt mascimal dal fonds de 500 mile euro por proieć che reverda i ćiamps dles infrastrotöres, dl ambiënt, di sorvisc soziai, dla cultura, dla formaziun, dl frabiché abitatif, dl trasport publich local, dl turism, dl comerz y dl’inovaziun.
Por ći che reverda le dagnì, sotrissëia le presidënt dla Provinzia Kompatscher, „dess Balsan y Trënt avëi plü pëis pro le spartimënt y l’assegnaziun dles ressurses finanziares. Y al dess inće gnì ciafè n’acordanza coletiva danter les regiuns y provinzies por ći che reverda la devijiun dl finanziamënt“, insciö Kompatscher.
Les modalitês de devijiun nöies prevëiga che tl dagnì dess 24 di 80 miliuns (40 miliuns de euro por provinzia) gnì metüs a desposiziun por bandides che reverda proieć presentà diretamënter dai comuns de confin, i 56 miliuns che resta gnarà assegnà a proieć tres n’acordanza danter les Regiuns y Provinzies autonomes aladô di arać dl Comitê paritetich. Dl Comitê fajaral pert Roger De Menech, i presidënć dl Venet y dla Lombardia y i presidënć dles Provinzies de Balsan, Trënt, Belun y Sondrio. I proieć che gnarà presentà messarà favorì y valorisé le svilup economich y sozial, l’integraziun y la coejiun di raiuns confinanć dl Südtirol y dl Trentin y podarà gnì planificà inće cun na dorada plurianuala de realisaziun.
rc
