Internet aslöm, 9 miliuns por le program dl 2015
Al à na soma de prësc 9 miliuns de euro le finanziamënt por le program dl 2015 por l’internet aslöm aprovè incö (24 de forà) dala Junta provinziala. „Ćina la fin dl ann – sotlignëia le presidënt Kompatscher – rovarà la fira otica te düć i comuns y insciö podaral mët man le svilup dl coliamënt d’azès final ai utënć.“
Sce dan da n per de dezenns gnô la competitivité de n raiun valutada dai coliamënć sön strada y dles ferates, é aldedaincö i coliamënć dla fira otica un di parameters plü importanć por le svilup dla competitivité. „L’internet aslöm é n’infrastrotöra de importanza fondamentala por la chersciüda dla sozieté dl Südtirol – à comentè incö le presidënt Kompatscher – deache ara conzed da sostignì le svilup economich, cultural y politich de döt le raiun.“ Le program da portè l’internet aslöm te düć i Comuns, inće te chi dles periferies, va inant cun n ritm costant y le presidënt Kompatscher à sotligné che „ćina la fin dl 2015 dess le 99,5 porcënt di abitanć dl Südtirol avëi la poscibilité de n azès a n coliamënt web sigü y aslöm con na capazité de trasmisciun di dać ćina a 20 Mbit/s.“
La realisaziun dla rëi telematica provinziala, n’opera che portarà la fira otica te düć i 116 comuns dl Südtirol, va inant do les tempistiches prestabilides, „y do chi i arun arjunt ćina la fin dl ann düć i pop – insciö le presidënt Kompatscher – podaràn se conzentrè sön le svilup dla rëi coliamënt d’azès final por rové ai anuzadus finai. Por completè chësc passaje é la colaboraziun danter la Provinzia, le Consorz di Comuns y les aministraziuns comunales fondamentala, inće tres le sostëgn metü a desposziun cun le fonds de rotaziun ativé ad hoc cun na dotaziun finanziara de 50 miliuns de euro.“ Ćina śëgn él gnü stlüt jö i laûrs por na rëi telematica provinziala cun la realisaziun de indöt 1.000 chilometri de ros y 800 chilometri de escavaziuns, cun na destanza che é chëra danter le Prener y Napoli. Tl 2015 él insciö preodü plü intervënć che é gnüs aprovà incö ( 24 de forà) dala Junta provinziala adöm a n finanziamënt de 8.990.000 euro.
Danter i proieć prinzipai por le 2015 él por ejëmpl le coliamënt danter le raiun Pillhof (Eppan) y les fraziuns de Missiano y Riva (cun na spëisa de 807mile euro), i coliamënć danter Salurno y Pochi de Salurn (515mile euro), Santa Valburga-Pracupola-S. Nicolò-S. Geltrude tla Val d’Ultimo (1.155.594 euro) y danter le raiun d’abitaziun Gudon cun le coliamënt prinzial danter Balsan y Porsenù (198 mile euro). Inće por ći che reverda i laûrs da portè l’internet aslöm ti frabicać publics él preodü la realisaziun dla „secunda rëi“ cun 2mile strotöres sön döt le teritore, danterlater proscimamënter dla Val di Vizze (274mile euro) y tl Sarenthein (138.829 euro).
rc
