Spezialisaziun di doturs: Löm vërda por na colaboraziun sura i confins
L’assessuria por la sanité Martha Stocker à ciafè inier (04/03) dala Direturia generala dles profesciuns tl setur sanitar Rossana Ugenti a Roma löm vërda por na convenziun suraregionala che reverda la spezialisaziun de doturs de medejina. Al é inće gnü tratè te d’atres incuntades le finanziamënt de medejines inovatives y la colaboraziun dla Claudiana cun sües Universitês de referimënt.
La tematica prinzipala dl’incuntada danter l’assessuria por la sanité Martha Stocker cun la direturia generala por les profesciuns tla sanité Ugenti é stada la proposta de na convenziun danter la Talia y l’Austria por ći che reverda la formaziun de spezialisaziun de doturs de medejina, na proposta che l’assessuria ti â bele presentè ala Ministra por la sanité Lorenzin y ala Ministra por la formaziun Giannini da d'altonn dl ann passè. „Le fin dl’acordanza é da öna na pert chël de podëi stlü jö le percurs de spezialisaziun sides tla Talia che tl’Austria, y dal’atra pert la segurëza garantida che i titui vëgnes reconesciüs tla Talia“, insciö l’assessuria por la sanité che à ciafè löm vërda inier (03/03) a Roma. Inće la Ministra dla formaziun à aprovè, tres so diretur de repartiziun Marco Mancini, chësta proposta de percurs y insciö pol gnì laurè fora tles proscimes edemes na convenziun definitiva danter l’assessorat y i Ministêrs y la Ćiamena di Doturs dl'Austria. L’assessuria Stocker é sigüda che chësta acordanza sarà na fondamënta iuridica sigüda por la formaziun de spezialisaziun por doturs dl Südtirol. Chësta dezijiun podess inće confermè y ćinamai amplié l’importanza di ospedai ti raiuns periferics dl Südtirol, che deventass n contest ideal por fà la spezialisaziun.
N’atra tematica che é gnüda tratada dal'assessuria tratan la sentada dla comisciun dla sanité tla conferënza dles regiuns é stada chëra dl finanziamënt de medejines inovatives che é gnüdes aproades da püch dal’AIFA, l’Agenzia che regolamentëia la defujiun dles medejines, por le tratamënt de Hepatitis C, por la cura de problems de metabolism y por le crebesc. Chëstes terapies nöies porta para n aumënt sostanzial y nia preodü de cosć de plü miliuns de euro por le sistem sanitar. Por le momënt él ma preodü n co-finanziamënt dal Stat por Regiuns cun n statut normal, deache les regiuns y provinzies autonomes ne à degun azés ai fonds che é gnüs metüs sö por finanzié chëstes spëises nöies. L’assessuria Stocker à ciafè löm vërda da podëi fà domanda, adöm ales atres regiuns autonomes, por n co-finanziamënt dles medejines nöies.
Por ći che reverda indere la Scora profescionala por profesciuns sanitares dla Claudiana à l’assessuria Stocker portè dant la problematica dla colaboraziun cun atres Universitês al diretur de repartiziun competënt Marco Mancini (che laôra pro le Minister dla Formaziun). „Les Universitês partner à problems da nes mët a desposiziun professurs a tëmp plëgn y chësc mët a risch i cursc de formaziun“, insciö Stocker. „I suranstanć dl Ministêr dla Formaziun nes à assiguré che le Südtirol ciafarà na regolamentaziun aposta cun chëra che al gnarà garantì inće tl dagnì la colaboraziun dla Claudiana cun sües Universitês de referimënt“, insciö Stocker.
rc
