Fonds di comuns confinanć: proiet dl internet aslöm por Alpes plü digitales
Incö (jöbia ai 5 de merz) él gnü tignì a Roma n’incuntada dl Fonds di comuns confinanć cun le presidënt Arno Kompatscher en rapresentanza dla Provinzia de Balsan: la tematica prinzipala é stada, dlungia i proieć da finanzié, la realisaziun de n program ampl che reverda dantadöt l’internet aslöm.
Secunda reuniun te manco de n mëis por l'organn de gestiun dl Fonds di comuns confinanć che s’à incuntè incö, jöbia ai 5 de merz, a Roma por tratè formes de colaboraziun nöies do na perioda lungia de discusciuns y debatüdes. Tla sentada da incö dl fonds di comuns confinanć, che à en gestiun le fonds por i raiuns che confinëia cun les provinzies de Balsan y Trënt, él gnü tratè na seria de proieć che vëgn finanzià cun na pert dl fonds (56 miliuns de euro sön i 80 metüs a desposiziun dales döes provinzies) che é gnüs assegnà tres n'acordanza coletiva danter les Regiuns y les Provinzies autonomes tl contest dl Comitê paritetich.
„Al messará se tratè dantadöt de acordanzes sön programs – sotlignëia le presidënt Arno Kompatscher - danter plü istituziuns teritoriales cun na dorada de tëmp lungia y cun finanziamënć da pert dl Comitê, dles Regiuns y, sce poscibl, inće dl Stat. Da chësc punt de odüda vëgnel inće ghiré n finanziamënt da pert de privać.“ Tratan l’incuntada, a chëra che al à tut pert inće le presidënt dl Comitê paritetich Roger De Menech, i suranstanć istituzionai dles Regiuns dl Venet y dla Lombardia, dles Provinzies de Balsan, Trënt, Belun y Sondrio, él gnü ponü les bases por valgügn proieć che vëgn conscidrà de priorité.
„Le pröm proiet – insciö Kompatscher – reverda l’internet aslöm: al é nasciü l’idea de na sort de digitalisaziun dles Alpes che podess s’inserì bun cun i programs atuai dl internet aslöm che vëgn metüs a jì sön livel nazional. Le proiet dess gnì realisé cun les ressurses dal Fonds di comuns confinanć, dles Regiuns y dl Ministêr por le svilup economich.“ Implü él preodü da sostignì proieć de coliamënt dla viabilité (inće por ći che reverda i trus por les rodes) danter i raiuns confinanć y che reverda les esperiënzes de gestiun deboriada danter plü Regiuns sciöche por ejëmpl dl Parch dl Stelvio o dles Dolomites patrimone Unesco. Löm vërda ti él gnü dè inultima ales deleghes operatives surandades al presidënt dl Comitê, Roger De Menech, che podarà insciö fà pié ia la licuidaziun di paiamënć di agn passà.
rc
