Dala Junta: Löm vërda por le program FESR, 136 miliuns de euro
La Junta provinziala à aprovè incö (mertesc ai 10 de merz) le program operatif di ‚investimënć por la chersciüda y l’ocupaziun’ por indöt 136 miliuns de euro. Tla perioda 2014 – 2020 podaràl insciö gnì finanzié proieć cun les ressurses dl Fonds europeich por le svilup regional (FESR).
La Comisciun europeica â aprovè ala fin de forà le program operatif presentè dala Provinzia de Balsan y che reverda i „investimënć por la cresciüda y l’ocupaziun’ – FESR por la dorada temporala dal 2014 al 2020. La Junta provinziala à incö valuté positivamënter l’atuaziun concreta dl program. „Les ressurses nöies dl FESR ti dà insciö n impuls al’economia locala y pormët investimënć de dorada lungia tles infrastrotöres“, sotlignëia le presidënt dla Provinzia Arno Kompatscher.
Le program prevëiga na seria de mosöres che é partides sö sön cater pilastri che reverda l’inrescida y inovaziun, le contest digital, n’ambiënt sostenibl y le teritore sigü. I obietifs prinzipai di investimënć reverda le potenziamënt dl’archirida, le svilup tecnologich y de sistems inovatifs, le mioramënt dla comunicaziun tres la rëi dl internet asvelt, l’e-government y l’e-learning. Atres prioritês sarà implü le sostëgn por n aumënt dl’efiziënza energetica y strategies por le smendrimënt dles emisciuns de ćiarbun, l’adatamënt ai mudamënć tlimatics y la prevenziun de risć.
I fonds a desposiziun di proieć é de indöt 136 miliuns de euro, partis sö cun le 50 porcënt che vëgn dal Fonds europeich por le svilup regional, le 35 porcënt finanziè dal Stat y le 15 porcënt dala Provinzia.
rc
