Concurs de lingać foresć: Resultat de morvöia por Otto Trebo d’Al Plan
Le concurs por lingać foresć dl raiun dl Tirol por scores profescionales dl’edema passada a Desproch à portè a n resultat plajor por le Südtirol: Tl concurs de inglesc, a chël che i mius 24 dl Südtirol, dl Tirol dl Nord y dl Ost à tut pert, él stè Otto Trebo da Al Plan che é rové al cuarto post dla tlassifica finala.
La scora alberghiera da Bornech à menè dui scolars a Desproch che à podü tó pert al Concurs de lingać foresć dl raiun dl Tirol por scores profescionales. I dui maturanć Jacimovic Mladen y Otto Trebo â naôta superè na prozedöra de seleziun interna dla scora por passè daldô ala fasa finala, olache ai s’à mosorè cun d‘atri 22 partezipanć dal Tirol dl Süd, dl Nord y dl Ost. Ai à albü insciö la poscibilité da se confrontè cun les conescënzes d’inglesc di studënć dl’Austria che à cotan plü ores de inglesc tl orar scolastich.
Otto Trebo da Al Plan à passè les proes desvalies cun gran bravöra y s’à tlassifiche por rové tla finala. Dailò messâl spo arjigné ca te 30 menüć n dialogh adöm a n’atra partezipanta y presentè na manifestaziun por inglesc a la iuria. Cun formulaziuns prezises y argomënć de valüta é spo Otto Trebo stè bun da se tlassifiché cun mirit al cuarto post.
„Le resultat de morvöia de Otto Trebo dess motivé i scolars y les scolares da se dè jö tres deplü cun concursc söi lingać y é la desmostraziun che les scores profescionales dl Südtirol ti pîta ai studënć n insegnamënt di lingac cun n livel alt“, à sotligné le diretur de Repartiziun Peter Höllrigl.
rc
