Val d’Isarch: Le Sorvisc Strades mët man cun la manutenziun straordinara
Tles proscimes edemes metarà man le Sorvisc Strades dla Provinzia cun i laûrs de manutenziun straordinara dles strades. Tl raiun dla Val d’Isarch gnaràl investì 1,58 miliuns de euro por mosöres che reverda les strades provinziales y 1,19 miliuns de euro por laûrs sön les strades statales. „Cun i laûrs orunse ti pité ai zitadins strades plü sigüdes“, dij l’assessur Florian Mussner.
„La manutenziun dles strades vëgn metüda da jì tres n program de prioritês che é gnüs stabilides do na ligna de critêrs tlers“, sotlignëia l’assessur por la manutenziun dles strades Florian Mussner. La gran pert di laûrs reverda inće chësc ann l’asfaltaziun dles strades. Insciö él inće preodü tl raiun dla Val d’Isarch na seria de laûrs d’asfalté, por ejëmpl sön les strades provinziales tl raiun da Porsenù y tla val de Puster (300.000 euro), sciöche inće les strades provinziales tl raiun de Sterzing (atri 300.000 euro). „Te prësciapüch n mëis metun man cun dui laûrs, che vëgn ćiamò finanzià cun les ressurses finanziares dl budget dl ann passè che fej fora döt adöm 796.000 euro“, recorda Martin Kanitscheider, le suranstant dl Sorvisc Strades dla Val d’Isarch. Por i ressanamënć de mürs de sostëgn, tlandri dles strades, metüda en segurëza de parëis dlungia les strades, ressanamënć di punć, tunì y dagns dal maltëmp él preodü n finanziamënt de 30.000 euro. N intervënt plü menü gnarà fat a Funés, olache al é preodü na spëisa de 180.000 euro por mët en segurëza la strada provinziala LS 27 dala tomada de peres. Por atri pići laûrs sön les strades provinziales él preodü inant na spëisa de 80.000 euro.
Por laûrs de ressanamënt de tlandri y de mürs de sostëgn sön la strada statala dla Val d’Isarch él preodü n investimënt de 70.000 euro. Indöt 242.000 euro gnarà metüs a desposiziun por le ressanamënt de mürs de sostëgn sön la strada statala dl Prener y por le ressanamënt de n punt sura le rü dl Isarch. La metüda en segurëza de parëis dlungia la strada dl Prener a Franzensfeste gnarà sostignida cun n contribut de 150.000 euro.
Por i laûrs de asfaltè vëgnel metü a desposiziun por le 2015 indöt 300.000 euro, intervënć é preodüs sön la strada statala SS12 Mauls – Prener, la strada statala Jù de Giovo – Sterzing (SS44) sciöche inće sön la strada statala dal Jù de Penes a Sterzing (SS 508). La medema soma é gnüda aproada por laûrs de asfaltè sön les strades statales tl raiun de Porsenù y sön la strades statales dla Val de Puster danter Vahrn y Kiens y danter Vahrn y Schabs (SS49/bis).
Prësc dötes les inćiaries che revera i laûrs de mautenziun dl Sorvisc strades vëgn surandades, tl respet dles normes y dles leges varëntes te chësc setur, a dites y imprejes locales, insciö l’assessur Mussner y sotlignëia che „tl 2014 é prësc düć i laûrs gnüs assegnà a imprejes locales y i sun sigü che an podarà garantì le medemo inće por chësc ann.“
rc
