La Provinzia se renovëia, dai 24 de merz na misciun nöia por la Rëi zivica
La Rëi Zivica oj plata: da en mertesc, ai 24 de merz sarà la misciun www.provinzia.bz.it completamënter y esculsivamënter a desposiziun dl’aministraziun provinziala, la Rëi Zivica sarà da ciafè tres la misciun www.reizivica.bz.it. La plataforma nöia dla Provinzia, che jarà online la proscima edema, sarà inće da ciafè por ladin.
Le cambiamënt dla misciun dla Rëi Zivica ne arà degönes conseguënzes sön i contignüs dl portal, che arà contignüs da plü istituziuns de livel comunal, raional y provinzial. Tres la misciun www.reizivica.bz.it podaran ciafè, zënza cambiamënć, na suraodüda sön dötes les noeles y düć i sorvisc che ti vëgn pità ai zitadins dal’Aministraziun provinziala, dal'Aziënda sanitara, dal Consorz di Comuns y dales Comunitês raionales. La misciun tradizionala y oramai dër conesciüda, www.provinzia.bz.it, gnarà adorada estlusivamënter sciöche portal dla Provinzia, sciöche inće damanè da Roma por esigënzes iuridiches.
Sce pro la Rëi zivica se müda ma la misciun, de plü sarà i cambiamënć pro la presënza online dl'Aministraziun provinziala che ciafa, deboriada cun n demane nü, inće na süa plata d'azès y n motor de chirida efiziënt fora dla ćiasa Google, che ti po pormez a düć i contignüs y sorvisc dl'aministraziun interna.
Ćina śëgn ê la presënza tl internet strotorada aladô de departimënć, repartiziuns y ofizi, śëgn gnaràra organisada aladô de 15 tematiches. Chësta strotoraziun dess scemplifiché la chirida de informaziuns a dötes chës porsones che ne conësc nia cis l'organigram dl'Aministraziun provinziala y les competënzes desvalies di ofizi y dles repartiziuns. L'assegnaziun di temesc é porater inće gnüda a s'al dè cun l'aiüt dl feed-back dles zitadines y di zitadins che à portè dant sües propostes tl cheder dl online-cardsorting l'ann passè da d'altonn.
Sön öna dles 15 plates tematiches nöies podarëise tosc gnì alsavëi döt sura le turism y la mobilité tl Südtirol, l'agricoltöra y i bosć, l'ert y la cultura, le laûr y l'economia, la formaziun y le lingaz o sön un di atri temesc. „Le proiet – sotlignëia l’assessuria por l’aministraziun Waltraud Deeg – fej pert de na strategia plü ampla de svilup dla digitalisaziun dl’Aministraziun provinziala y che à sciöche obietif chël de adorè les poscibilitês nöies dles tecnologies dla comunicaziun por scemplifiché y mioré i sorvisc por i zitadins. L'aministraziun publica à le dovëi da s'adatè ales esigënzes di zitadins y da s’ajorné cun standarg de cualité moderns.“
rc
