Indoman metarà man le Festival dla jonëza dl’Euregio
Söporjö 100 jogn y jones dal Südtirol, Tirol y Trentin tolarà pert da indoman (25 de merz) ćina a en sabeda ai 28 ala cuarta ediziun dl Festival dla jonëza dl’Euregio. Al se trata de na manifestaziun cun plü incuntades te düć trëi i raiuns dl’Euregio (Riva del Garda, Maran y Stams) por aprofondì i aspeć desvalis intoronn ala tematica prinzipala „Costruì deboriada l’Euregio“.
Cun indoman, mercui ai 25 de merz, metarà man la cuarta ediziun dl Festvial dla jonëza dl’Euregio, na manifestaziun dedicada daldöt ai jogn danter i 16 y i 19 agn dl’Euregio. La scomenciadia vëgn organisada dal ofize GECT Euregio cun süa sënta a Balsan, en colaboraziun cun la Provinzia de Balsan, la Provinzia de Trënt y le Land Tirol. Le titul dl’ediziun de chësc ann é „Costruì deboriada l’Euregio“.
Ćina en sabeda ai 28 de merz podarà i 100 partezipanć dal Südtirol, Tirol y Trentin inrescì tematiches desvalies che reverda plü aspeć dl dagnì di raiuns desvalies, danter l'ater „Laurè y studié tl’Euregio“, „Ert y creativité“, „Mobilité zënza confins“ y „Natöra y ambiënt“. Les incuntades y debatüdes gnarà tignides te trëi posć desfarënć: l’ediziun 2015 piarà insciö ia a Riva del Garda/Arco, por daldô jì inant a Maran y gnarà stlüta jö a Stams tl Tirol. Dlungia la pert dles incuntades pîta le festival inće n program ampl cun debatüdes danter i jogn partezipanć.
rc
