BBT: La Junta à aproè le proiet por la costruziun dles galaries prinzipales
La Junta provinziala à aproè incö (24 de merz) le proiet por la costruziun dles galaries prinziplales dl tunel de basa dl Prener che reverda dui loć a Mules. I cosć por la realisaziun dl proiet é de 1,4 miliarg de euro. La planificaziun di cantiers messarà tignì cunt dles esigënzes di Comuns interessà.
I cosć por la realisaziun de chësta pert dl proiet dl tunel de basa – i loć 2 y 3 de Mules – é de 1,4 miliarg de euro. La Junta provinziala à aproè incö, mertesc ai 24 de merz, te süa sentada edemala le proiet por la costruziun dles döes galaries prinzipales dl tunel de basa da Mules tla direziun dl Prener ćina le confin cun l’Austria. Adöm al’aprovaziun à la Junta provinziala confermè les prescriziuns dla valutaziun ambientala fata dal Comitê por l’ambiënt. „Implü à Junta stabilì che la planificaziun y la gestiun di cantiers mëss gnì fata adöm cun i Comuns interessà“, à sotligné le presidënt dla Provinzia Arno Kompatscher tratan la conferënza stampa.
Les prescriziuns da tignì ite reverda la sconanza dla popolaziun y dl ambiënt, prescriziuns pro le trasport dl material, la sconanza dles fontanes d’ega, l’osservaziun y la reduziun dl incuinamënt acustich.
Sciöche preodü dal proiet gnaràl spostè le material d’escavaziun tres les galaries dles ferates te deponies de material tla Val de Riga tl comun de Varna. Tl cantier de Mules gnaràl efetuè na pröma seleziun dl material, por despartì le material che po indô gnì adorè por la realisaziun de petun por i laûrs d’ampliamënt di tunì. Por sconè les fontanes d’ega él preodü mosöres de proteziun che prevëiga programs d’osservaziun dles fontanes y formes de refornimënt alternatives d’ega, che é bele gnü realisades ti ultims agn. Implü él inće preodü analises detaiades dla costruziun di cantiers, dles carateristiches dl’acustica di implanć adorà y dl respet di limić de incuinamënt acustich che messarà gnì aproades dal ofize competënt dla Provinzia.
rc
