Tlausöra Junta: Aprové le plann di laurs publics 2015-2019
187 operes, investimënc por indöt 380 miliuns cina le 2019 cun les strades dl Prener, dla Val de Puster y dla Val Venosta sciöche priorités prinzipales: chësc é le contignü prinzipal dl plann plurianual 2015-19 dla Repartiziun Infrastrotöres che é gnü aprové incö (27 de merz) dala Junta provinziala. L’entrada dla Val Badia é lapró.
„Al se trata de n program che tëgn cunt da öna na pert dles esigënzes de bilanz – á sotligné l’assessur Christian Tommasini – y dal’atra pert dla nezescité da ti dé plü pëis al setur dles costruziuns y di laurs publics che á messü y mëss dötaurela fá le cunt cun la crisa economica. Les dezijiuns che reverda les operes da stlü jö y da mët man por la perioda 2015-2019 é gnüdes tutes sön la basa de na gradatöra cun priorités metüda adöm do criters obietifs, te chël che i ún tut en conscidraziun dantadöt l’aspet dla segurëza, dla nezescité di laurs y dla relaziun danter i cosć y i vantaji. Les trates plü importantes sön chëres che al gnará laoré sará chëres dl Prener, dla Val de Puster y dla Val Venosta“.
Le plann aprové incö (27 de merz) dala Junta provinziala prevëiga n investimënt complessif de 380 miliuns de euro dal 2015 al 2019, de chisc 90 miliuns é preodüs por le 2015. Dal 2016 inant él preodü por le momënt na spëisa anuala de 72 miliuns de euro (80 porcënt dl investimënt dl 2015), mo olache an porvará da arjunje vigni ann i 90 miliuns. Chisc investimënc dess porté, insciö él preodü, a stlü jo indöt i apalc por 187 operes. Por él gnü apalté 67 laurs, é por atri 26 aplac dess i laurs gní scric fora cina la fin dl 2015.
Pro les operes plü importantes da scrí fora por le 2015 aldél l’azes ala Val Badia, la sortida de Porsenú zënter, la metüda en segurëza dla strada dla Val d’Ega tla trata Balsan y Karneid, la proteziun da lovines y da la tomada de peres sön la strada statala dla Mendola y la galaria cuntra les lovines sön le Ju dl Jaufen. Danter les operes che é tl program él ince da ciafé i intervënc de mioramënt dles incrujades dl percurs dl Metrobos che coliëia Balsan cun Eppan y Kaltern.
„I ún ciaré da compensé les mëndres ressurses a desposiziun cun na programaziun plü spezifica y na definziun dles priorités aladô de criters tecnics. Insciö sunse stá bugn da elaboré n program cun chël che al é poscibl da mioré la rëi dles strades dl Südtirol. I obietifs prinziapi romagn la garanzia de na maiú segurëza por i autisć y da smendrí le trafich ti zëntri de paisc y cites por aumenté la cualité de vita dles zitadines y di zitadins.“
rc
