Campagna cuntra i inzidënc cui motors No Credit: Scomenciadies nöies
Cun na grafica nöia y na ligna de aziuns mirades al aumënt dla segurëza sön strada él la Provinzia de Balsan che á ince planifiché por chësc ann na ligna de mosöres de sensibilisaziun tl contest dla campagna „No Credit“. L’assessur Florian Mussner y le diretur Valentino Pagani á presenté incö ai 30/03 i contignüs nüs, adom al procuradú general Guido Rispoli y le primar Manfred Branstätter.
Sensibilisé, motivé y informé: chisc é i trëi obietifs prinzipai dla sesta ediziun dla campagna de sensibilisaziun dles Repartiziuns Mobilité y Sorvisc Strades dla Provinzia „No Credit“, che é gnüda presentada incö, lönesc ai 30 de merz tl Safety Park a Pfatten. „Vigni comunité á regoles tleres, a chëres che düc mëss se tigní, nia ma por ne mët nia en prigo la vita dl singul mo ince chëra di atri“, á sotligné l’assessur por la mobilité Florian Mussner. „La segurëza sön strada é fondamentala por la proteziun dla vita di atri, mo ince por respeté l’ambiënt y la natöra. Porchël él important da se tignì tres ales normes stradales, da rovëne sigüsc y cun prudënza“, insciö l’assessur Mussner.
Le diretur dl Departimënt Mobilité y Sorvisc Strades Valentino Pagani á presenté te süa relaziun i dac atuai dl’ASTAT sön i inzidënc mortai cun i motors tl Südtirol. Sciöche al vëgn desmostré dai dac, é le numer di motoziclisć feris dal mëteman dla campagna de sensibilisaziun jüs zoruch. „Tl 2005 êl ciamó 25 morc por gaujia de n inzidënt cun le motor, tl 2006 ê le numer jü zoruch a 14 y dal 2006 él resté costant danter 10 cina 15. Tl 2014 dess le numer di morc do na cumpëda inofiziala ester de 14“, insciö le diretur Pagani. „Ince sce i sun ma stá bugn da evité un n inzidënt mortal cun motoziclisć spo é l’obietif dla campagana bele gnü arjunt“, insciö Pagani.
L’assessur Mussner y le diretur Pagani á spo descurí le motif nü dla campagna 2015, olache an vëiga l’indicadú de velozité cun sön la man dërta mersces de sanch che mostra les conseguënzes de na velozité massa alta. „Le simbol grafich chirí fora por la campagna de sensibilisaziun „No Credit 2015“ á le focus sön l’ezes de velozité, na guajia che massa gonot porta a inzidënc cun morc sön strada. Avëi na velozité esagerada ne o nia dí automaticamënter che le autist va plü debota co i limic preodüs, mo che la velozité ne vëgn nia adatada ales condiziuns dl tëmp, dla strada, dl trafich y dla visibilité“, recorda Pagani.
Dlungia le simbol grafich nü, che sará da odëi sön i placac dlungia strada, sön les corieres, architades dles corieres y sön i flyers te de plü lingac (ladin, talian y todësch), á la campagna ciamó trëi d’atri pilastri fondamentai. Por aumenté la segurëza di motoziclisć él insciö preodü, sciöche ince ti agn passá, n’ajornamënt costant dla segnaletica y dl’ilumiaziun dles strades, n ressanamënt de strades cun l’asfalt danejé y l’istalaziun de 2630 metri de tlandri dla strada nüs cun na proteziun aposta por i motoziclisć sön 63 trates dër prigoroses.
Implü n ater pilaster de „No Credit“ é le control y monitoraje cun aziuns mirades dles forzes dl ordinn y dla polizica comunala y stradala diretamënter sön les strades. Le compit primar de chëstes aziuns dess ester la sensibilisaziun y informaziun di motoziclisć, mo sce al vëgn costaté n comportamënt nia coret, ince l’esecuziun de multes. Ince chësc ann gnarál efetué controi dala polizia comunala y stradala tratan i fins dl’edema y dis de festa cun na presënza dër alta de motoziclisć sön i jus y tles trates adorades de plü dai motoziclisć dla Talia y da foradecá.
Inant jará ince la colaboraziun cun le Safety Park, olache al é gnü realisé n flyer cun informaziuns ütles y cun chël che i motoziclisć ciafará ince na diminuziun di cosć por cursc de segurëza y d’ajornamënt al Safety Park.
Le procuradú general Guido Rispoli á sotligné te so referat i aspec dla responsabilité zivila y penala pro i inzidënc: „Ince sce valgügn á ma na gaujia secondara pro n inzidënt, pol porté a conseguënzes por la responsablité. Implü oressi sotligné che i autisć ne dess mai bëre alcol.“ Le procuradú general á recordé l’importanza dles mosöres de prevenziun y á laldé la campagna, che á dé, do so arat, n contribut por smendrí i inzidënc sön strada.
Pro i inzidënc é n intervënt abonora y spezialisé de gran importanza, á sotligné daldô le primar dl sorvisc de pröm intervënt Manfred Branstätter, che á cunté sö les conseguënzes fisiches poscibles de n inzidënt cun le motor, danter l’ater sön le ciorvel, i organs interns, le sistem dles avënes y che po porté ince a paralises. Deache i motoziclisć ne á degönes segurëzes passives, sciöche n airbag, cioi de segurëza y lercs por smendrí l’impat, esi dër a prigo de ferides, insciö Brandstätter che va instës ince cun le motor. I consëis de Brandstätter por i motoziclisć é danter l’ater n dërt echipmënt, da ne jí nia massa debota y da rovëne te na manira cosciënta.
rc
Galaria dales fotografies
