Consulënza sanitara ti raiuns desvalies: i pröms vari tl 2015
Ciamó tl 2015 gnarál daurí tles 20 sëntes di raiuns sanitars provinziai na consulënza sanitara locala por l’assistënza y la cura che ará le compit da informé y da pité consulënza diretamënter söl post ai componënc de families che adora sostëgn y assistënza.
„L’informaziun, la consulënza y l’acompagnamënt de mëmbri de families che á de bojëgn de assistënza é zënz ater n sostëgn ajuntif y n alisiramënt por les families, dantadöt canche al se trata de na nezescité che se presentëia zënza preanunzia“,sotlignëia l’assessuria por la sanité y les politiches soziales Martha Stocker che ajuntëia: „Chësta domanda de aiüt nes é gnüda portada dant plü iadi da pert dles families, y do avëi fát valgönes esperiënzes positives, orunse daurí na consulënza sanitara locala d’assistënza y cura tles sëntes di raiuns sanitars.“
Por chësta rajiun él gnü metü da jí i pröms vari te chësta direziun che dess gní realisá por la fin dl 2015. La basa iurida vëgn garantida tres la lege omnibus aproada ala fin dl ann 2014. „Por le momënt vëgnel planifiché l’organisaziun dla consulënza y dl acompagnamënt danter i sorvisc desvalies di raiuns. Na colaboraziun danter les sëntes ti fej nia ma sparagné tëmp y ressurses ales families mo ince ai ënc che se crüzia di sorvisc y ales ciases de palsa“, sotlignëia le diretur dla Repartiziun Politiches soziales Luca Critelli.
rc
