Sorvisc joliers dla Provinzia: acordanza 2015 – 2019
La Junta provinziala á aprové inier ( 31 de merz), sön proposta dl’assessur por la mobilité Florian Mussner, la prozedöra por la formulaziun de n’acordanza cheder cina al 2019 che reverda le sorvisc cun i joliers por compic istituzionai dla Provinzia.
Les Repartiziuns dla Provinzia pó s’anuzé dl sorvisc di joliers por completé na ligna de compic istituzionai dá danc avisa, che reverda por ejëmpl suralüsc, le trasport de porsones, intervënc te caji de medefüch y por gaujia de atres desgrazies naturales y por la recuperada de tiers vis. Nia pert ne fej de chësta acordanza cheder i sorvisc de elisocurs y dl socurs sö por munt. „Por motifs de sparagn y de efiziënta él gnü metü adöm n’acordanza cheder che reverda i sorvisc de dötes les repartiziuns provinziales“, spliga l’assessur Florian Mussner. Sön süa proposta á la Junta aprové inier, mertesc ai 31 de merz, la prozedöra por la formulaziun dl’acordanza cheder nöia.
Tres l’acordanza por i proscims cater agn – la dorada de chëra atuala va a piz cun le mëis de má – gnarál definí cater imprejes spezialisades che podará gní inciariades tl dagní por organisé jori de sorvisc cun le jolier por l’Aministraziun provinziala cina le 2019. Por podëi garantí i sorvisc messará les imprejes avëi n punt de racoiüda o na picera spersa d’ateraje por joliers te Südtirol. Por la formulaziun dl’acordanza cheder por i proscims cater agn él preodü n finanziamënt de 1,55 miliuns de euro. Al gnará ma paié fora les spëises por les inciaries efetuades dales imprejes nominades por jori che é jüs efetivamënter fac.
rc
