Museums | 01.04.2015 | 15:17

Chirida de üs da Pasca tl museum dles usanzes y tradiziuns

Le Museum provinzial dles usanzes y tradiziuns da Dietenheim organisëia ince chësc ann indô la chirida tradizionala de üs da Pasca por mituns y mitans en Lönesc de Pasca ai 6 de aurí y che sará ince l’ocajiun por la daurida dla sajiun museala dl 2015.

Ince chësc ann á le lou da Pasca, adöm a sü colaboradus, ascognü indô de plü cënc de üs da Pasca te döt le raiun dl Museum provinzial dles usanzes y tradiziuns de Dietenheim. La chirida por i mituns y les mitans metará man dales 14.00 dl Lönesc de Pasca ai 6 de aurí, implü sarál ince da odëi y da aziché n valgügn conici y loi. I mituns y les mitans dla scolina da Dietenheim ciantará n valgönes cianties da Pasca por chësta gaujiun, dales 15 y 17 se fistidiará dl intratignimënt musical i „Eisacktaler“.

Plü informaziuns pon ciafé tres le Museum dles usanzes y tradiziuns de Dietenhiem, strada Herzog Diet 24, Bornech (0474 / 552087; plata internet: http://www.volkskundemuseum.it/).

rc

Galaria dales fotografies